Nakadungog na gyud tingali mo aning gitawag nga Yoga. Kana bang, matud pa sa diksiyonaryo Padre Cabonce, S.J., pamanton sa utok, kon ehersisyo diin imong patuhopan ang kalinaw sa imong hunahuna.
* * *
Ang nag-Yoga (kinsa gitawag og Yogi) seryoso kaayo sa ilang pagtuman sa mga lagda niining ehersisyo sa utok. Magpiyong-piyong ang mga mata. Maglingkod nga tisar ang lawas.
* * *
Karon naay bag-ong matang sa Yoga nga gitawag og Laughter Yoga diin ang mga Yogi magsigi’g pangatawa aron kuno makab-ut ang maayong panglawas.
* * *
Ang mga deboto ning bag-ong klase sa Yoga manindog ug magpunay og katawa. Bisan walay kataw-anan ug bisan dili kakataw-unon pugson gyud ang kaugalingon sa pagkatawa.
* * *
Ay ingnang murag mga buang kay ang ilang gibuhat alang sa kaayohan sa panglawas ug aron katambalan ang ilang gibati nga sakit sa lawas.
* * *
Duna kunoy scientific basis kini. Kay di ba nga giingon nga "a merry heart doeth good like a medicine." Ug matud sa Reader's Digest, "laughter is the best medicine."
* * *
Sugyot sa mga nagpasiugda niining Laughter Yoga, kun nagluya ang imong lawas o ba kaha nag-antus ka sa depressed feeling, ikatawa kana. Pugsa ang kaugalingon sa pagkatawa hangtod makakatawa ka sa imong gihimo nga suma pa sa uban kataw-anan.
* * *
TRIVIA -- Cheer up mo diha mga higala ta sa Talamban ... Katawa bisan ang atong kandidato nangiwit sa survey. Hehe.