EDITORYAL - Pahalipay ngadtong Tomas

Thumbs up kami kang Mayor Tomas Osmeña. Pahalipay ngadto kaniya gumikan sa dinaliang aksiyon diin gipalagpot niya ang 31 ka mga Citom traffic enforcers nga giakusahang nangilkil.

Ayaw pagtuo, Mayor, nga sayop ang imong gibuhat tungod kay panahon ron sa eleksiyon. Politically correct.

Mao nay aksiyon nga gikalipay sa mabuot nga miyembro sa atong katilingban. Kinahanglan dili hatagan og lugar sa atong katilingban ang mga gitahasan sa pagsilbe sa katawhan apan milikoy ug namiktima na hinuon sa ilang silbihanan.

Pahalipay ug salamat, Mayor, sa aksiyon nga imong gihimo. Ingon ana sab unta ang himuon sa mga kadagkuan sa Citom aron kahatagan ang Citom og pagtahod sa komunidad nga nagsuhol kanila.