Galit na ang araw?

Noon ay bumagyo – pagkalakas-lakas

Sinundan ng bahang kagilagilalas;

Marami ang taong nawala nautas

Halaman at hayop hindi rin naligtas!

Dahil sa nangyari itong ating bansa –

Naghirap, nagdusa raming nasalanta;

Halos di huminto ang ulang sagana

Kailangang tubig sumobra na yata!

At ngayong tag-araw ay sobra ang init

Ang nasasalanta’y kaparanga’t bukid;

Halaman at isda kinulang sa tubig –

Kaya ang tagtuyot ay humahagupit!

Sa lahat ng dusang ating titiisin

Ay ang sobrang init – mahirap batahin;

Kapagka natuyo ang mga bukirin

Tao’y magugutom, gulo’y iiral din!

Ang mga bukiri’t inaaning palay

Natuyo’t nalanta sa tindi ng araw;

Kaya nanganganib itong ating bayan –

Walang kakainin mga mamamayan!

Mga dam at ilog ay natutuyo rin

Hayop at halaman wala ring makain;

At ang enerhiyang kailangan natin

Posibleng humintong magbigay ng hangin!

Maraming probins’ya ngayo’y apektado

Ng init ng araw na nakapapaso;

Mistulang ang araw galit na sa tao

Kaya tayong lahat ay namimilegro

Talagang iba na takbo ng panahon

Kaya ang daigdig naghihirap ngayon;

Ang dulot ng bagyo’y tubig na may lason

Ang dala ng araw mapamuksang apoy!

Kaya ang marapat dasalin ng tao

Sa dakilang Diyos na hawak ang mundo:

Ang lindol — isa pang mapamuksang tao

Huwag sanang maganap sa panig na ito!