EDITORYAL - Ang panglawas ni Tomas

Si Mayor Tomas Osmeña gibalita nga mobiyahe nasab ngadto sa Amerika sa naghinapos nga semana niining buwana.

Ang tuyo sa mayor mao ang pagpa-checkup sa iyang health kun panglawas.

Maayo unta kun kining paglarga sa mayor dili kahatagan og political color sa mga tigpaniid sa politika.

Kini maoy panahom sa usa ka sakop sa usa ka Catholic women’s group gumikan kay kini bahin man sa panglawas sa mayor.

Matud niining sakop sa gihisgutang pundok sa kababayen-an, kinahanglan nga anaa sa maayong panglawas si Tomas tungod kay magpadayon pa man ang tinguha niini sa pagsilbe sa Sugbu.

“Dili kita gusto nga masakiton ang usa ka tawo nga buot mosilbe kanato,” panapos pa sa miyembro ning Catholic women’s group.