Angay nato ikalipay ang pasalig sa Department of Justice nga walay sacred cows (kun mga tawong paboran) sa operasyon bahin sa imbestigasyon sa masaker didto sa Maguindanao.
Angay lang. Kinahanglan gayud nga walay dapigan. Ihawon ang dapat ihawon. Ug dili langay-langayon.
Apan sa sinugdan pa lang duna may namatikdan ang mga tigpaniid nga mora’g dunay sacred cows nga gitapin-an. Kay ngano kuno nga wa man dayon arestaha ang gidudahang utok sa masaker?
Unya miingon pa ang tigpamaba sa gobiyerno nga ipaagi pa sa due process ang akusasyon batok sa giingong utok.
Hatagan ta na lang og benefit of the doubt ang DOJ. Manghinaut kita nga wala gyu’y sacred cows suma sa pasalig niini.