Ampatuan, political warlords?

Sa akong pagsuwat ning maong lindog anaa na sa 47 ka mga patay’ng lawas sa mga biktima sa masaker didto sa Maguindanao ang naugkat sa mga otoridad. Apil sa mga naugkat mao ang 12 ka mga patay’ng lawas sa mga magsisibya ug mga mamahayag ug duha ka mga abogado nga giapil sa pagpamatay.

Ang mga magsisibya ug mga mamahayag ug duha ka abogado nga igo lang tawon nga nagtuman sa ilang trabaho sa pag-cover sa pagduso ni Jenalyn Mangudadatu sa kandidatura sa iyang bana nga magpapili sa pagka gobernador sa Maguindanao ang giapil sa pagpatay sa mga ikogan ug sungayan nga mga kriminal.

Migawas sa imbestigasyon nga gihimo sa militar ug kapolisan ang pangalan sa mga politikong Ampatuan sa Maguindanao nga maoy utok sa linoog nga krimin. Migawas usab sa pinakauwahing imbestigasyon ang pangalan sa Director ug Assistant Director sa kapolisan sa Maguindanao nga maoy nagbantay sa sobra o kuwang usa ka gatos ka mga armadong tawo nga mibabag ug midagit sa convoy sa mga Mangudadatu nga paingon na unta sa Commission on Election aron sa pagduso sa certificate of candidacy ni Vice Mayor Toto Mangudadatu sa pagka Gobernador sa Maguindanao.

Usa ka taga Cotabato ang nagsulti kanako nga ang nahitabo kaniadtong November 23 dili mao ang una sa mga Ampatuan tungod kay ang maong pamilya aduna nay mga usa ka gatos ka mga tawo nga gipamatay ug gipanglubong atubangan sa kapitolyo sa Maguindanao. Apan wala gayoy usa sa pamilyang Ampatuan ang nataral sa hukmanan aron bayran ang salaud nga nahimo. Walay kalainan sa mga political warlords kining mga politikong Ampatuan didto sa Maguindanao.

Apan sa kangilngig sa krimin nga gihimo, igo lang gipakigsultian sa administrasyong Gloria Macapagal Arroyo ang mga Ampatuan. Ina kay posasan ug ibalhog sa prisohan, igo lang gihapohap sa administrasyong Arroyo ang buko-buko sa mga Ampatuan. Dapat kun may uwaw pa ang gobyerno ni Gloria, iya na unta nga giposasan ug gibalhog sa prisohan ang usa sa mga Ampatuan nga gitumbok nga maoy utok sa linoog nga krimin.