Kasuhan. Kailan?

NAGLABAS na ng rekomendasyon ang Senate Blue Ribbon Committee sa anomalyang ZTE/NBN. Matapos ang higit dalawang taong imbistigasyon, nirekomenda ng komite na kasuhan ang lahat ng may kinalaman sa naturang anomalya, kasama ang mag-asawang Arroyo, sina Benjamin Abalos Sr. at Romulo Neri, mga tauhan ng DOTC tulad ni Leandro Mendoza, Elmer Soneja at Loren­zo Formoso, si Lito Atienza ng DENR, Deputy Executive Secretary Manuel Gaite, pati rin mga humarap para isi­walat ang nasabing kontrata katulad nila Joey de Venecia III at Jun Lozada. Sa madaling salita, lahat ng may kaugnayan sa ZTE/NBN. Dapat daw imbistigahan at kasuhan ng Ombudsman ang mga nasabing tao.

Pero natatandaan ninyo ang resulta naman ng im-bes­tigasyon ng Ombudsman ukol sa nasabing kontrata. Inabsuwelto nila ang mag-asawang Arroyo, pati sina De Venecia at tauhan ng DOTC. Hindi raw pwedeng kasu-han ang Presidente dahil immune siya sa prosekyusyon. Ano kaya ang gagawin ng Ombudsman ngayong reko­men­dado ng kasuhan ang mga inabsuwelto nila? Ano na ang mangyayari kay Lozada, na siyang nagsiwa­lat nang maraming detalye ukol sa ZTE/NBN? Hindi na nga naging normal ang kanyang buhay dahil sa ginawa niya, at ngayon kakasuhan pa! Hindi naman kasi siya isang Chavit Singson na nagpahayag na magpapa­ku­long din siya kung makukulong si President Estrada, pero nung nangyari na nga iyon ay umalyado na sa kasa­lu­ku­yang administrasyon, at malaya!

At gaano naman kaya katagal aabutin ang kasong ito? Baka tatlong administrasyon na nakalipas, wala pa ring mangyari sa mga may sala! Malalakas at mayaya-man ang mga taong ito, maliban na lang siguro kay Loza­da. Sa bansa natin, ang batas at hustisya ay nabibili ng pera at takot. Habang nasa poder ang mga iyan, o may kilalang nasa poder, walang mangyayari sa kasong iyan, lalo pa’t nandiyan pa ang kasangga nilang Merceditas Gutierrez! Maganda itong nasimulan ng Senado. Pero sino ang magtatapos? O baka ang mas mahalagang tanong, kailan ito matatapos at may makukulong na? Kung uupu­an lang ng Ombudsman, walang saysay ang ma­gandang balitang ito. Parang pinaasa lang ang mamamayan na magkakaroon na ng katarungan!