Ilihim man, matutuklasan din ng BITAG!

PITONG TAON at patungong ikawalo na ang BITAG sa larangan ng serbisyo publiko. Kaya naman, hindi na ma­ka­pagtatago ang sinumang lumalapit sa aming tang­gapan, ano man ang intensiyon nito.

Mula sa kaniyang pagsasalita, kilos ng katawan, galaw ng mata, pintig ng puso at lalim ng hininga, natutunan na naming basahin kung ang isang nagrereklamo o nagsu­sumbong nga ba ay nagsasabi ng totoo o may dalang tahi-tahing kuwento. May mga nagrereklamo kasing hindi kumpleto mag­bigay ng impormasyon at kung minsan baligtad pa ang sumbong.

Ito ‘yung mga ibang lumalapit sa aming tanggapan na itinatago ang tunay na sitwasyon ng kanilang proble-ma laban sa kanilang inirereklamo.

Pinipilit nilang itago sa akalang kapag sinabi nila ang katotohanan ay hindi na sila tutulungan ng BITAG.

Ayaw na ayaw namin ‘yung tinatawag na “areglo”, paulit-ulit na lamang naming sinasabi na hindi kami nakikialam at nanghihimasok o namamagitan sa ganitong usapan.

Para sa isang nagrereklamo o biktima kasi, ginagawa lamang kaming panakot kung ang kanilang pakay lamang ay areglo. Mabuti na lamang at nag-iimbestiga ang aming grupo bago namin tuluyang hawakan ang isang problema o kaso.

Kasama sa aming imbestigasyon ang kilalanin at tanungin ang respondent o ‘yung inirereklamo, dito unti-unti ng lumalabas ang katotohanan.

At sa paghaharap ng dalawang panig, ang nagre­reklamo at inirereklamo kasama ang BITAG, nalalantad na buong dahilan at epekto ng problema.

Sa huli, hindi lamang ang inirereklamo ang may tama, pati ang nagrereklamong nagtago ng kanilang tunay na intensiyon sa BITAG at sa kaniyang reklamo, hina­ha­gupit din namin.

Sa mga gustong gamitin ang aming programa para sa kanilang pansariling intensiyon lalo na ‘yung may kinalaman sa areglo at pera, binabalaan namin kayo.

Itago niyo man sa um­pisa, maaamoy din ng BI­TAG ang katotohanan. Tra­ba­ho namin ang mag-im­bes­tiga kaya’t kahit ang nagre­reklamo, dumadaan sa aming pagsusuri o pag-profile.

Tumutulong kami sa ka­hit sino, wala kaming pinipili basta’t nangangailangan ng katarungan upang lumabas ang katotohanan, kakampi upang itama ang baluktot na gawain at sumbungan upang tuldukan ang pang-aabuso sa lipunan.

Wala itong bayad alin­sunod sa larangan ng ser­­bisyo publiko subalit kung gagamitin lamang ang aming programa para sa pansariling kapritso, uma­tras na kayo.