Ang tigpamaba sa Archdiocese sa Sugbo, Msgr. Achilles Dakay, miingon nga way tuyo si Arsobispo Ricardo Cardinal Vidal nga imantala sa Bag-ong Lungsoranon ang iyang gipirmahan nga notisya maglabot sa pagkatangtang ni Venancio Cabillon alyas Frater Paul Mary isip sakop sa Marian Monks diha sa Simala, Sibonga.
Si Dakay mihimo sa maong pagpasabot human ang kanhi monghe misang-at og kasong libel batok sa cardinal ug sa laing tulo pa ka mga opisyal sa simbahan nga sila si Msgr. Cristobal Garcia ug Rev. Fr.Marnell Mejia ang mga tagdumala sa Bag-ong Lungsoranon ug sa prior superior sa Lindogon Shrine nga si Frater Martin Mary.
Ang kaso naggumikan ni sa gipublikar nga notisya sa Bag-ong Lungsoranon niadtong Agosto 9 diin gipahibawo ang mga rason nganong gitangtang si Cabillon isip monghe.
Matud ni Cabillon nga dili tinuod ang maong mga rason ug gitumong ni sa pagdaot sa iyang kadungganan tungod sa iyang pagbulgar sa mga hiwi nga binuhatan sulod sa monasteryo.
Si Cabillon sa sayo pa mitug-an nga nalambigit sa mga pagpangilad ang tagdumala sa monasteryo pinaagi sa pagpatuo nga nagmilagro ang imahin sa berhin pinaagi sa paghilak og dugo aron sila makakuha og daghang hinabang.
Gawas niini gitug-an sab ni Cabillon nga ang uban nga mga monghe nalambigit sa “sodomy” pinaagi sa pagpakighilawas sa kauban nga mga monghe.
Si Dakay miingon nga dili tuyo ni Cardinal Vidal nga ipublikar ang notisya nga iyang gipirmahan. Sumala pa ni Dakay nga ang pagpirma sa cardinal wa magpasabot nga niuyon siya sa pagpublikar tungod kay ang pirma sa cardinal nagpasabot lang nga niuyon siya sa mga hinungdan pagtaktak ni Cabillon.
Pastilan pud si Msgr. Dakay mura man og Grade I section Kamunggay mohimo og palusot. Buot ba niyang ipasabot nga wa basaha ni Cardinal ang kinatibuk-ang notisya sa wala pa siya mopirma?
Imposible sab siguro nga ang grounds ra maoy gibasa sa cardinal mao nga wa siya masayod nga notisya diay ang iyang gipirmahan. Kun notisya gani, buot ipasabot niini isangyaw gyud ngadto sa publiko.
Wa man ihimakak ni Dakay nga dunay gipirmahan ang Cardinal buot ipasabot nga nasayod gyud siya niini. Tugotan ta nga dili tuyo sa Cardinal nga ipublikar ang maong notisya sa mantalaan, nganong bug-at man sa iyang kabubut-on ang pagpangayo og pasaylo.
Ang gidemanda ni Cabillon mao ra man ang pagpangayo og pasaylo sa simbahan sa gihimong pagpakauwaw kaniya. Kun wa tuyoa ang pagpublikar nganong di man mangayo og pasaylo ang Arcbishop Palace?
Hangtud nga di mangayo og pasaylo ang kadagkuan sa Archdiocese magpabilin ang pagtuo sa kihante ug sa publiko nga ang gihimo nila gitumong gyud pagpakauwaw agi og panimawos sa gihimong pagbulgar ni Cabillon.
Kun nakigkonsabo ang Archdiocese aron pakauwawan si Cabillon, unsa may mapaabot sa publiko nga aksiyon sa simbahan sa mga pasangil ni Cabillon. Seryoso ang pasangil ni Cabillon busa kun di mogunok ang Archdiocese pag-imbistigar niini buot ba ipasabot nga ilang gitugotan ang mga law-ay nga kalihukan sulod sa monasteryo lakip na ang pagpangilad?
* * *