Dakong trabahuon

Daku pa nga trabahuonon nilang Senador Noynoy Aquino ug Mar Roxas ang pagkumbinser sa mga mayor sa nasud nga mosuporta sa ilang kandidatura sa sunod tuig nga presidential election. Base sa balita, si Naga City Mayor Jessie Robredo lamang ang komitado sa Noynoy-Mar tandem. Nahibaw-an kini human si Mayor Tomas Osmeña milupad og tuyo ngadto sa Davao aron makig-meeting kang Noynoy. Laing meeting iyang giadto ang kang Senador Chiz Escudero.

Nahibaw-an didto sa Davao nga ang mga mayor wala pay consensus kinsa sa gustong mag-presidente ang buot nilang suportahan. Ang nindot paminawon nga ang mga mayor naminaw sa mga palisiya sa buot mag-presidente, ilabi na ang palisiya unya nila sa mga lokal nga kagamhanan, kahusay ug kalinaw ug ang kalinaw sa Mindanao. Apan alang kanako, dili na maglisud silang Noynoy ug Mar. Simple kaayo ang akong tan-aw niini: dili mahimong motalikod ang mga mayor sa gusto sa kinabag-an.

Sa pagkakaron, bisan asang suok, ang baba sa mga botante molitok og Noynoy-Mar tandem. Apan kun unsa kakugihan nilang Noynoy ug Mar sa pagkumbinser sa mga tawo pagsuporta nila, ingon usab kakusog ang paninguha ni Chiz pagpaila sa iyang kaugalingon isip maayong alternatibo. Si Chiz kanunay’ng nagbalikbalik sa Sugbo.

Samtang ang kampo ni Senador Manny Villar mihilom lang og kalit. Sumala pa sa amigo nakong editor sa laing mantalaan, ang campaign effort ni Villar mao ra’g computer nga nag-reboot. Gipasabot niya nga nagsugod kini pagbalik gumikan sa kakusog sa Noynoy-Mar tandem sa pagkakaron.

Si Defense Secretary Gilbert “Gibo” Teodoro usab nga maoy gipili sa Lakas-Kampi-CMD nga standard bearer sa administrasyon, wala gyud mailhi sa masa. Kun buot niining maka-apas sa kakusog sa Noynoy-Mar tandem, maayong manaog siya sa mga squatter area ug magpaila nga gusto pud diay siyang mag-presidente.

Bisan unsaon tingale og panghambog sa Malacañang nakabintaha si Gibo kay anaa sa Lakas-Kampi-CMD ang makinarya, ang masa mopadayon gihapon og singgit og “Noynoy-Mar.” Sa bahin ni kanhi Pres. Joseph Estrada, pasagdi lang una na siya pag-depensa sa iyang kaugalingon, mahitungod sa Dacer-Corbito murder. Hinuon, layo pa ang Mayo 2010. Daghan pa og mahitabo.

* * *

Nalingaw ko sa closing party sa Press Freedom Week nga gihimo sa Mariner’s Court sa ALU compound sa Pier 1 niadtong miaging Sabado. Ang panag-kompetensiyaay gipadaplin una aron saw-an ang usa ka gabii nga lingaw-lingaw. Salamat sa San Miguel Brewery Inc. nga sulod sa dugay’ng katuigan, wala mapul-i paghatag og lingaw ngadto kanamong mga sakop sa media.

Ning tuiga ko lang natagamtam og balik ang kaanindot sa Press Freedom Week, gumikan sa nangaging duha ka tuig nga didto ako sa Manila magyampungad matag Sityembre tayming sa kasaulogan sa among kagawasan. Nakapalingaw kanamo ang lainlaing presentation sa mga beat reporters. Apan gawas sa lingaw nga ilang nahatag, kaming mga editor nakapupo og pagtulon-an nga bisan kada adlaw nila kauban ang ilang mga tinubdan sa balita (sama nila ni Mayor Tomas Osmeña, Gob. Gwendolyn Garcia, Jonathan Guardo, etc.) aduna gyud diay silay tagsatagsa ka baruganan sa mga isyu nga ilang gihatod ngadto sa publiko, taliwala sa prinsipyo nga kinahanglang ‘objective’ ang coverage.

Sama pananglit sa presentation sa mga reporter sa Talisay, maayo kaayong pagka-compose sa ‘parody’ sa kantang Baleleng nga gikanta ni Marlon Bellita sa DyAB. Ang parody mahitungod sa Balili lot nga naglubog ang halapad sa tubig-dagat, apan sa katapusan sa kanta mi-entra si Noy Pabling, ug sama sa iyang anak nga si Gwen, buot nga ang Balili transaction ipadayon. Kanta lamang kadto. Nangatawa ang mga sakop sa media.

Apan ang katawa posibleng nagkahulugan og duha ka butang: Nangatawa kay nalingaw sa kanta o nangatawa gumikan kay nasabtan ang interes sa mga Garcia nianang kontrobersiyal nga transaksiyon sa yuta sa mga Balili sa Tinaan, Naga.

Gani, sa maong kanta lamang ni Marlon ako nakapanghinuklog ngadto man tuod nga nagkatakdo man ang baruganan ni Kongresista Pabling Garcia ug sa iyang anak nga gobernadora.

Wala maka-eskapo si Bokal Juan Bolo sa kanta ni Marlon. Apan klaro sa mga titik sa kanta ang simpatiya ngadto kaniya, kay sa mag-amahan nga Garcia nga nabantog sa ilang impluwensiya diha sa politika. Dungan sa akong pagkatawa ang paghunahuna nga malampuson ang kampanya sa Kapitolyo paglikoliko sa isyu aron adto tanan idan-ok kang Bolo ang pagbasol sa katawhan. Ginamit ang mga tambulero sa Kapitolyo, giduot pag-ayo si Bolo samtang kanunay’ng tabunan ang pirma ni Gwen sa Memorandum of Agreement (MOA) ug sa tseke nga gibayad sa Kapitolyo ngadto sa mga Balili. Pun-an pa gyud sa Provincial Board nga mura’g stamp pad ni Gwen, gi-umol aron mo-imbestigar sa transaksiyon bisan sila mismo nasayod nga adunay tulobagon gumikan sa pag-uyon sa resolusyon aron mapalit ang luna. Nagtuo ba kamo nga kanang “investigate us” nga sitwasyon sa Provincial Board mahuman pinaagi sa pag-ingon “sad-an kami?”

Ambot lang!

* * *

Gipakita lamang ni Efrain Pelaez Jr. atol sa Cebu Citizens Press Council (CCPC) meeting sa Marriott Hotel niadtong Biyernes ang gusto niyang mahitabo sa media sa Cebu – nga siya maoy tuohan ayaw ang uban. Atol sa meeting, gipabuhagay niya ang iyang mga kaligutgot ngadto sa pipila ka sakop sa media nga mibira kaniya. Wala niya hunahunaa nga ang maong tigum gihimo isip Consultation Tree sa pagpanindot sa election coverage sa 2010.

Naglagot siya nganong wala siya tuohi sa pipila ka kolumnista sa iyang expose sa mga computer sets sa dakbayan sa Lapulapu. Wala niya hunahunaa nga ang kaso gipaminaw sa Ombudsman nga nagsusi sa kaso base sa mga ebidensiya nga gisumiter ug dili pinaagi sa opinyon sa mga kolumnista. Ang wala nako ma-uyoni mao nga gipakabugo ni Jun Pelaez ang mga sakop sa media pinaagi sa pag-ingon nga mas mapublikar ang mga ka