Mga tex-payers na unya tang tanan

CEBU, Philippines – Naay balaudnon nga mopahamtang og tax sa text messages. Suma pa sa balita five centavos ang tax matag “message sent.” So tex-payers na unya tang tanan, kitang 70 million mobile phone owners.

* * *

Hinuon matud pa sa naka-ideya niining text tax, ang telecom companies -- Globe, Smart, Sun, etc. -- maoy moabaga sa tax. Dili kita. Tuo ka? Tuo nalang kay total wa man tay mahimo.

* * *

Cash-strapped ang atong gobiyerno. Wa’y kuwarta. Mao nga nakahunahuna og dangop kanato. Tiaw mo bay 300 million ka text messages ang atong himuon kada adlaw. Sa tag singko sentabos matag message, pila ka million ang magordo sa gobiyerno ngari kanato? Hala sumaha ninyo diha.

* * *

Balikon ta. Dili kuno ang tig-text-text ang mobayad sa text tax kun dili ang telecom firms. Dili kaha mangita ang bright boys sa telecom firms og paagi nga mapasa ngari kanato ang buhis?

* * *

Bright boys gud na sila. Nakaimbento man gani sa pasa-load. Di kaha sila maka-imbento sab og pasa-text?

* * *

Kini kunong text tax nga makolekta adto kini punta sa government coffers nga suma pa ni resigned Economic Planning Secretary Ralph Recto “practically empty.”

* * *

Hinaut nga modiretso kining text tax sa panudlanan sa gobiyerno -- gobiyerno nga matud pa ni Ralph Recto “brankrupt.” Ug dili na unta masangit sa laing panudlanan.