Pakauwaw lang

Gidayeg nako si Gobernador Gwen Garcia kay wala siya magpanagana sa pagpangayo’g pasaylo sa katawhan dihang namatud-an nga nakapalit ang probinsya og yuta nga ang kabahin niini anaa sa dagat.

Giangkon niya nga nasayop g’yod sila sa probinsya kay midiritso lang pagbayad sa gibaligya nga 25 hektareya nga yuta sa pamilyang Balili nga wala usa himoi og survey ang kinatibuk-ang luna.

Diriyot g’yod tawon mabiktima sa probinsya. Tiaw mo nga ang kabahin sa maong kayutaan dunay nasakop nga pagatpatan, mga punong ug kahunasan.

Salamat sa mga tawo nga mibulgar sa maong isyu, ingon man ni geodetic engineer Fortunato Lazaro nga maoy mikonpirmar nga tubigan ang kabahin sa maong property.

Unya, tinuod ba kadto nga ang nag-deal sa maong yuta mao si Provincial Board Member Juan Bolo? May nakita ko nga “footage” sa usa ka TV report nga si Bolo igo lang nagkatawa.

Ingon ba diay niana ang usa ka opisyal sa kagamhanan nga mo-deal og kayutaan nga walay klaro? Ang leksyon niini mao nga kamong mga opisyal sa kagamhanan ayaw g’yod mo dayon pagsalig.

Kun buot kamo mopalit og property sama sa kayutaan, susiha usa og hain kini mahimutang.

* * *

Ang kayutaan nga iya ni Roque Ting ug nalakip sa pagmugna sa South Reclamation Project kaniadto, bayran usab sa dakbayan bisan og may kabahin niini nga diha usab kaniadto sa dagat.

Lahi hinoon ang sitwasyon sa dakbayan sa Sugbo kay karon lang sila mihukom nga bayran na g’yod si Ting nga ang hukmanan mihukom na nga pabayran g’yod ang tag-iya sa yuta.

Kun mangutana kamo nganong natitulohan sa banay’ng Ting ang maong kayutaan nga diha man kini sa dagat, wala g’yod kini matuki didto sa korte.

Igo na nga si Ting nakapapresentar sa husay nga duna siya’y titulo nga giisyu sa Land Registration Authority, usa ka ahensya nga ubos sa Department of Justice.

Apan “wise” ang mga opisyal sa dakbayan. Kay si Ting andam ra man modawat og P13.5 milyones basta dili na langay-langayon ang pagbayad.

Aron dili maisyu nga ang dakbayan mibayad og yuta nga diha kaniadto sa dagat, ilang ibutang nga ang dakbayan mobayad sa yuta apan kadto ra nga “dryland” kaniadto, apan sama ra gihapon ang kantidad.

Ha! HA! Pagka-wise g’yod.

* * *

Gibalik-balik sa mga opisyal sa dakbayan nga dili gayod pabayron ang mga pasyente sa dengue nga magpatambal diha sa Cebu City Medical Center.

Apan nganong ang kabanayan niadtong 4-anyos nga taga Guadalupe nga namatay gipapalit man nila og dagum alang sa dextrose ug sa pagkuha og blood sample sa usa ka “donor.”

Unsa kaha’y tubag niini ni Dr. Myrna Go. Syaro, bisan dagum wala mo’y stock Dr. Go? Pakauwaw ka man lang tawon uy. Ayoha god na og pagdumala ang CCMC aron dili ka masawayan.

Unya og pakighinabian ka ra ba sa media, mora ka’g nakakita og “Abat” nga lihay ka pang Pacquiao.

Ang tawo nga walay gitagoan dili mahadlok nga moatubang sa mga reporters.

Sayonan ka nga duna may instruction sa mga gwardya nga kun dunay mosulod nga media nga magdala og camera dili dayon pasudlon.

Unsa, security threat ba diay ang mga sakop sa media diha sa gidumala nimong ospital Dr. Go?

Dugangan nato ugma ang pagtuki sa mga isyu diha sa CCMC.