Suporta kang Noynoy

Human sa kamatayon ni kanhi Presidente Corazon Aquino diin nasaksihan sa nasud kun unsa ka daghan ang mga nagpangga ug nagsuporta kaniya milutaw karon ang panawagan alang sa pagkandidato sa iyang bugtong anak lalaki nga si Senador Noynoy Aquino pagka-presidente sa 2010 elections.

Ang mga mensahe sa text nga nagtuboy ni Noynoy nga molansar pagka-presidente misugod pagkatap niadtong Miyerkules dungan sa paglubong sa kanhi Presidente. Apan ang maong mensahe dali nga gibaliwa sa mga kaalyado ni Noynoy sa politika.

Si Kongresista Ruffy Biazon miingon nga ang mensahe usa lang ka intriga aron magubot ang Partido Liberal nga una nang mituboy ni Senador Mar Roxas nga maoy ilang kandidato pagkapresidente.

Apan bisan kun ma-intriga man o seryoso ang mga tinguha pagduso ni Noynoy ang usa sa mga supporters sa iyang inahan dinhi sa Sugbu nga si kanhi Bise Gobernador ug Manlalaban Democrito Barcenas mipadayag na sa iyang suporta sa posibleng kandidatura ni Nonoy.

Si Barcenas nga natudlo isip acting vice governor panahon ni Cory miingon nga dako og kahigayonan si Noynoy tungod sa suporta sa katawhan sa ilang pamilya. Apan alang nako tinuod daghan ang misuporta sa ilang pamilya panahon sa kasub-anan apan wa ni magpasabot nga ang tanang misuporta kanila mobotar pud ni Noynoy.

Si Noynoy tinuod wa ta makadungog nga dunay pasangil sa kontrobersiya apan di sab siya ingon niana ka maayo og labok didto sa Senado. Sukwahi sa uban nga mga Senador nga mi standout si Noynoy di kaayo nimo madunggan nga makiglantugi.

Wa hinuon ni magpasabot nga wa sab siya’y hibangkaagan sama sa uban nga nahimo lang senador tungod kay sikat. Si Noynoy nasayod kong makamao apan di lang sama sa uban nga hilig og grandstanding hinungdan nga di gyud siya mo standout.

Sa pikas bahin hinuon kini maoy maayong hiyas sa usa ka lider ang mapaubsanon ug dili trapo sama sa iyang mga kauban sa Senado nga hilig og grandstanding.

* * *

Gitinguha ni Bokal Juan Bolo sa unang distrito sa lalawigan ang pagpahunong sa “war games” sama sa “airsoft” tungod kay matud niya wa gyud ni kaayohan nga nahimo gawas sa pagsakit-sakit lang sa lawas.

Gihimong rason ni Bolo ang hitabo sa usa sa mga airsoft tournaments dinhi sa Sugbo pipila ka buwan na ang milabay didto sa dakbayan sa Danao diin nagkagubot ang mga players.

Misampot gyud gani sa kinihaay ang maong insidente. Apan gawas niadto wa nay laing kagubot nga nahitabo sa mga airsoft tournaments. Gani bag-o lang nahuman ug malampuson nga napahigayon ang first season sa Governor Gwen Garcia airsoft open championship.

Inay nga ipahunong ni Bolo ang kalingawan sama sa airsoft nga wa gyu’y kwarta sa gobyerno nga nausik, mas maayo tingali nga unahon niya pagpahunong ang mga kalihukan sa ubang mga opisyal nga migamit sa ilang pwesto aron pagpangwarta.

Pananglitan, maayo ipahunong ni Bolo ang kalihukan sa usa ka opisyal nga maoy mangahente og yuta aron ibaligya ngadto sa kagamhanan. Unya paburoton ang presyo aron kunohay mogawas nga nakabarato ang gobyerno apan ang tinuod minus ra kaayo ang gidawat sa tag-iya sa yuta.

Ang sobra sa kantidad nga gidawat sa tag-iya kumo ang opisyal man maoy nangahente maoy nakapahimulos. Kini maoy angayang unahon og atiman ni Bolo ug dili ang pagpanghilabot sa kalihukan sa paugnat sa kusog.

* * *

[email protected]