Gihagit ang LGUs

Ang mga local government units (LGUs) gihagit sa pagpakita sa ilang concern kon pagpakabana sa mga pinasagdang bata nga nagkinahanglan sa pag-amuma ug pag-alinga.

* * *

Ang hagit mitumaw gumikan sa nagkadaghang mga batang libud-suroy nga atong makita sa kadalanan dili lang dinhi sa Sugbo kundili usab sa ubang dapit sa nasud. Pinasagdan. Dinagmalan. Gipanamastamasan.

* * *

Ang miitsa sa hagit ngadto sa mga LGU mao ang executive director sa Batang Pinangga Foundation nga si Judah "Butch" Carpintero. Matud ni Carpintero nagkagrabe ang pagkamakalolooy sa atong mga streetchildren.

* * *

Tungod kay wa'y misagop kanila ug mihatag kanilag saktong pag-amuma, kadaghanan niining mga batang-karsada gigamit na sa mga crime syndicate ug ang mga babaye nahug sa kamut sa mga prostitution operators. Pait nga palandungon.

* * *

Matud ni Carpintero ang kagamhanan wala pa makapakita sa tinuoray gayud nga pagtagad kun pagpakabana sa makalooy nga kahimtang sa mga batang pinasagdan. Ang gisaad nga poverty alleviation programs nagpabilin lang gihapon nga saad.

* * *

Naay mga pribadong pundok nga mitabang sa pobreng kabataan -- nga nagsuroy-suroy lang sa kadanan ug anha mangatulog sa aseras -- apan ang resources niini limitado. Gawas sa Batang Pinangga Foundation, naa ang Task Force Streetchildren ni Mrs. Margot Osmeña, ug uban pa. Apan kulang ra sa pundo aron mapalapdan ang ilang operasyon.