Fixers sa LTO mga waray?

Dili pa dugay sukad gipatuman ang anti-red tape, ang balaud nga maghatag of silot sa mga masakpang nalambigit sa “fixing” sa mga transaksiyon sa gobyerno. Ang buhatan sa Ombudsman maoy ahensiya nga nanghingusog sa kampanya batok sa mga fixers diha sa mga buhatan sa gobyerno pinaagi sa pagpakig-alayon sa mga tinugyanan sa balaud.

Sa akong awahing pakighinabi ni Deputy Ombudsman for the Visayas Pelagio Apostol matud niya nga iyang laraw ang pagpahigayon og “oplan anti-fixer.”

Kun fixer maoy hisgutan mosampot dayon sa atong huna-huna ang mga ahensiya sa gobyerno nga nagkatap ang mga fixers. Usa na niini mao ang buhatan sa Land Transportation Office.

Ang fixers mao ni ang mga tawo nga mo-process sa imong transaksiyon aron mas sayon ug mapadali alang nimo ang trabaho.

Tungod kay sila man maoy molihok natural nga mas mahal ang imong bayran kay sa angayan untang kantidad. Dunay duha ka matang sa mga fixers diha sa mga ahensiya sa gobyerno. Una mao kadtong mga dili empleyado apan dunay koneksiyon sa sulod sa ahensiya. Ikaduha, empleyado mismo sa usa ka ahensiya sa gobyerno ang modawat sa transaksiyon og maoy molihok bugti sa dakong kantidad nga iyang pangayoon.

Diha sa LTO, ambot unsa ka tinuod nga sukwahi sa naandang talan-awon kaniadto nga ang mga fixers mosugat nimo diha sa gawas sa opisina karon wala na. Mopagakpak na unta ko ni Direktor Raul Aguilos kay iyang nasumpo ang fixers nga naglihok gawas sa iyang opisina apan ang kasaligan nako nga tinubdan miingon nga mao nga wa nay fixers nga mosugat gawas sa LTO kay tua na sa sulod mismo sa maong buhatan magyampungad ang mga kanahan.

Sumala pa sa akong tinubdan nga napapas ang operasyon sa fixers diha sa gawas tungod kay dunay grupo sa mga “waray” nga gikatahong maoy naghari karon diha sa maong opisina.

Dili ko motuo nga gibitbit sila ni Aguilos, apan sulagma ba lang nga siya usa pud ka waray? Aron kalikayan ang pagduda nga mga binuhi sila si Aguilos maayo tingali nga badlongon ug ipadakop niya ang maong mga tawo.

* * *

Laing reklamo batok sa LTO nga angayang sulbaron ni Aguilos mao ang giingong pagpangabuso sa ilang mga deputized agents. Midangop nako ang usa ka kontraktor sa norte tungod sa matud pa grabing pagpangabuso sa mga sakop sa Task Force Delta diha sa Liloan.

Ang kontraktor kinsa dunay proyekto diha sa maong dapit nagkanayon nga duha na kahigayon nga ang iyang pribado nga dekarga gitangtangan og plate number sa mga sakop sa Task Force Delta kay giakusahan nga nag-operate nga kolorum.

Abi ko og way rehistro ang maong de karga hinungdan nga gidakop. Apan matud sa kontraktor nga gipasanginlan siyang kolorum ang iyang de karga kay wa kuno’y franchise gikan sa Land Transportation Franchising and Regulatory Board.

Kanus-a pa man gimando sa balaud nga ang usa ka pribado nga sakyanan kinahanglang molukat og prangkisa? Wala gamita ang maong de karga aron paabangan kon dili gipalit sa tag-iya aron kargahan sa mga materyales alang sa iyang construction project. Bisan pananglitan og dunay nalapas nga lagda sa trapiko ang drayber niini way katungod ang mga sakop sa Task Force Delta pagkuha sa plate number gawas kun wa kini’y rehistro.

* * *

[email protected]