47. Si Masaru Emoto

Laing nakahimo’g pagtuon mahitungod sa tubig mao ang giilang genius ug visionary researcher nga si Masaru Emoto sa Japan. Sulod sa 25 ka tuig nagtuon siya bahin sa tubig ug iyang nasuta nga ang maong elemento walay kalainan sa usa ka buhing linalang.

Siya’y tagsulat sa librong Message From Water. Sa maong libro, iyang gipatin-aw nga ang tubig maoy media nga magdala sa life force ug magpabuhi sa mga organismo. Ang tubig sama sa tawo nga mo-respond ngadto sa musika, gugma ug ubang emotions.

Gipadayag ni Emoto nga ang mensahe sa tubig alang nato mao ang paghimo’g mas seryosong pag-ila ug pagtan-aw sa atong kaugalingon. Niya pa, ang kalidad sa tuig nga anaa sa sulod sa atong lawas may direktang kalambigitan sa matang sa atong pagka tawo.

Dugang niini, gibutyag ni Emoto nga ang kalibotan adunay water body nga 70 porsiyentong tubig. Gibanabana nga ang total quantity sa tubig sa kalibotan mokabat sa 326 trillion ka galon. Ang 97 porsiyento niini mao ang lapad nga tubig-dagat nga dili mainom (gawas lang kun i-desalinate).

Adunay lamay 3 porsiyento nga fresh water ug dul-an sa 80 porsiyento niini na-frozen sa polar ice caps ug glaciers sa lainlaing dapit sa globe. Tungod niini, usa na lang ka porsiyento ang tubig nga nahibilin nga magamit sa tawo, mananap, tanom ug uban pang mokonsumo niini.

Si Emoto mipasabot nga kita nagpuyo diha sa usa ka water body ug ang outside water natural lang nga ma-attract sa tubig sulod sa atong lawas. Kun moinom tag lab-as nga tubig gikan sa mountain spring, ang atong lawas mahimong energetic. (Sunod: Ang Teertha)