Suko na mi sa SOCO

Wa pa gyod diay mapitol sa kadagkoan sa atong kapolisan kining mga personnel sa Scene of the Crime Operatives kon Soco. Kaniadtong miaging semana ang mga police na usab sa lungsod sa Borbon ang nagreklamo tungod sa kalangay sa pag-abot sa mga personnel sa Soco nga ilang gitawagan aron masusi ug mapreserbar ang dapit nga nahitaboan sa krimen.

Sigon sa taho, alas 10:30 pa sa buntag gitawagan ug napahibawo na sa police sa Borbon ang personnel sa Soco mahitungod sa krimen nga nagkinahanglan sa ilang serbisyo apan alas 4:30 na sa hapon naabot ang mga personnel sa Soco didto sa lungsod sa Borbon. Resulta, ang patay nga lawas sa biktima sa krimen nanimaho na pagmaayo.

Ambot og sakit na ba gyod ni sa mga personnel sa Soco ang pagkalangayan nga motubag og alarma sa krimen. Di pa lang dugay gikastigo na ni sila sa pagsaway ug gani gipangsuspenso na ni sila sa ilang trabaho gumikan gihapon sa pagkalangayan pero wa gihapon motagam. Mao na gyod kaha ni ang kultura sa ilang buhatan? Kun mao man, suko na ta sa Soco!

Giindorso na ni Inday Neri si Carlo sa pagka kongresista sa ika- unom nga distrito sa lalawigan sa Sugbo. Ang atong pangutana karon, kinsa man ang bise mayor ni inday Neri nga kongresista man diay ang daganan ni Carlo? Matinood kaha ang hung-hong sa akong dewende nga si LQ ang bise mayor ni inday Neri sa iyang pagdagan pagka Mayor sa dakbayan sa Mandaue unya ang mga konsehal iya sa mga Ouano? Kun ugaling mao na ni ang linya sa team ni Nerisa mag unsa naman lang si Cowboy Jonas?