EDITORYAL - Pahalipay sa Tsuneishi

Bisan pa sa nagpadayong global economic crisis kon kalibutanong krisis sa ekonomiya, ang Sugbu nagpadayon usab sa pagbarog batok niining ekonomikanhong problema.

Labing ulahing balita nagkanayon nga ang Tsuneishi Heavy Industries diha sa Balamban nagpadayon sa pagpanghimo’g barko ug sa pagkakaron migama kini og bulk carrier nga maoy labing dako sa tibuok kalibutan.

Tungod niini, nagkinahanglan ang Tsuneishi og labing menos 3,000 ka mga trabahante nga ipuno sa 6,000 ka mga tawo nga anaa na sa payroll sa maong shipbuilder.

Kining nagpadayon nga pag-usbaw sa patigayon sa Tsuneishi diha sa Balamban mipakita nga dunay ekonomikanhong kahayag ang Sugbu ug hinaut unta nga dili kini sudlan sa politika.

Pahalipay ngadto sa Tsuneishi tungod sa dakong pagsalig niini sa maayong business climate dinhi sa Sugbu.