Nag-imbitar og kagubot

Napasar na sa House of Representatives ang kontrobersiyal nga Con-Ass resolution niadtong Martes sa gabii. Apan hangtud sa pag-adjourn sa Kongreso sa ilang session kagahapon wa pa masayod ang liderato sa ubos Balay Balauranan unsay sunod nilang buhaton.

Si Speaker Prospero Nograles miangkon nga wa siya masayod unsay sunod nga mahitabo human sa pagpasar sa House Resolution 1109 nga nagtinguha pag-convene sa Kongreso isip Constituent Assembly aron pag-usab sa Batakang Balaud.

Si Nograles miingon nga atol sa ilang pagbalik sa session karong Hulyo posibling mo-convene sila isip Constituent Assembly nga wala ang Senado o ba kaha ipadala una ngadto sa Senado ang ilang naaprobahan nga resolution.

Wa man gud magkauyon bisan ang mga mibotar sa con-ass resolution kun unsay sunod nga mahitabo human niini. Ang mayoriya miingon nga mamahimo na sila nga mo-convene og largo ug amendahan ang Constitution apan ang uban miingon nga dili pa tungod kay gikinahanglan pa nila ang pag-uyon sa Senado.

Si Deputy Speaker Pablo Garcia, usa sa mga giila nga Constitutionalist sa nasud, miingon nga ang resolution maisip lang nga imbitasyon sa mga miyembro sa Kongreso aron mo-convene isip Constituent Assembly.

Matud ni Garcia nga kun dili dawaton sa Senado ang imbitasyon wa gyuy mahitabo nga pag-usab sa Batakang Balaud. Apan lahi ang gusto sa kadaghanan nga kaalyado sa administrasyon tungod kay gusto nila nga ibaliwala ang Senado.

Ang maong lakang nakasamot hinuot sa pagduda nga dunay nagpahipi nga motibo ang ilang tinguha pag-usab sa Constitution. Kay kun walay laing tumong dili mahitabo nga ilang ipamugos bisan og apiki.

Nitumaw sab karon ang kasayuran nga gisaaran sa Malakanyang og dugang P20 milyones nga pork barrel ang mga kongresista nga mibotar sa con-ass resolution. Unsa may interest sa Malakanyang nga subornohan ang mga kongresista?

Usa sa gitan-aw niini mao ang pagsiguro nga magpabilin si Presidente Gloria Macapagal Arroyo sa pwesto. Ang pag-usab sa Constitution gitan-aw nga maoy unang option nga gitan-aw sa Malakanyang aron magpabilin si Arroyo sa gahum pinaagi sa paglugway sa iyang termino.

Kun mapakyas, ang laing plano sigun sa mga political observers mao ang paglansar ni Arroyo isip miyembro sa parliament aron modagan pagka primiro ministro sa nasud kun mahinayon ang pag-usab sa atong sistema sa gobyerno.

Sa ingon niini, magpabilin gihapon si Arroyo sa gahum pagsiguro nga kaprotehian ang iyang kaugalingon gikan sa posibling mga kaso nga iyang atubangon human sa pagkapupos sa iyang termino tungod sa mga pasangil sa korupsiyon atol sa iyang pamunoan.

Ang pagpamugos sa mga kongresista nga kaalyado sa administrasyon nga mo-convene isip Constituent Assembly ang Kongreso bisan way labot ang Senado usa ni ka lakang nga nag-imbitar og kagubot sa nasud.

Karong panahon sa kalibutanhong krisis sa ekonomiya dili maayo alang sa usa ka pobre nga nasud sama sa Pilipinas nga magkagubot. Hinunoa angayan nga magtinabangay ang atong mga opisyal unsaon pagpangita og paagi aron kapugngan ang lapad ug dako nga epekto sa krisis.

[email protected]