15. Tubig sa gripo

Bisan og nauso na karong panahona ang pag-inom og purified drinking water ug ubang binotelyang tubig ilimnon, daghan pa gihapon ang atong kaigsuonan nga mikuha sa ilang tubig ilimnon gikan sa gripo.

Dugang gasto man god ang pag-inom sa binotelya ug gi-purify nga mga tubig ilimnon sanglit ang tubig usa na man ka dakong negosyo karong panahona alang niadtong may kahimanan sa paglimpiyo niini sa nagkadaiyang mga paagi.

Kamatuoran niini, nanggusod daw mga uhong sa nagkadaiyang dapit ang daghang water refilling stations nga nagtanyag og limpiyong tubig mainom nga gipailawom sa purification sa lainlaing matang sa proseso.

Ang tubig sa gripo maoy labing baratong tubig mainom. Mas makabentaha pa gyod kun sa dapit nga imong gipuy-an adunay tinubdan o kaha atabay. Gawas nga libre ug limpiyo, lami sab kaayong imnon ang tubig nga kinuha gikan sa ilawom sa yuta.

Sumala sa mga eksperto, dili angay kabalak-an ang tubig nga naggikan sa gripo. Ang kaluwas sa tubig sa gripo nagdepende sa edad ug kalidad sa mga planta nga naglimpiyo sa tubig, nagmuntar sa mga tubo nga agian niini ug uban pa.

Posibleng mahugawan ang tubig gikan sa gripo kun kini naggikan sa mga linaw, dam ug kasubaan. Apan kun ipailawom kini sa estriktong pagsag-a (filtration), malimpiyohan ang maong tubig. Ang uban butangan og chlorine aron luwas nang imnon ang tubig.

Apan kun daan na ang tubong giagian sa tubig, posibleng makainom kag taya, zinc, tanso, tingga ug aluminum. Busa mas maayong may salaan sab ang imong gripo. (Sunod: Depende Sa Anad)