4. Importanteng Elemento

Ang tubig importante kaayo sa kinabuhi sa tawo. Ang tawo kanunay miila sa tubig isip mahinungdanong gabayan sa pagbugtaw ug pagbaton og himsog nga panglawas ug maayong kinabuhi.

Si A.R. Hari, tagsulat sa librong Water: A Miracle Therapy mibutyag nga ang ancient Indians nag-isip nga ang tubig usa sa lima ka importanteng elemento sa kinaiyahan nga nagpalig-on sa tawhanong lawas.

Tinuod nga ang tubig usa sa mahinungdanong elemento nga nagpalig-on sa atong lawas. Kini tungod kay 70 porsiyento sa atong lawas ang giokupar sa tubig. Tungod niini, dili angay ikahibulong nga bation nato ang kauhaw sa tubig kay kini naghatag man og kabaskog sa atong lawas.

Ang kakulang sa tubig diha sa lawas makapaluya sa tawo. Apan sa higayon nga mapun-an sa tubig ang iyang lawas, inanay nga mobalik ang iyang kalagsik ug mas epektibo niyang matuman ang iyang gimbuhaton nga tipik ug kabahin sa iyang inadlaw nga panikaysikay.

Si Hari mihulagway sa tubig isip usa ka “aid in maintaining good health.” Motuo ka’g sa dili, ang hustong consumption sa tubig diha sa saktong quantity ug quality mas importante pa kay sa kalidad sa pagkaon nga pagakan-on sa tawo.

Niini, atong masuta nga ang tubig usa gayod ka importanteng elemento nga angay masulod sa lawas sa tawo. (Sunod: Ang Ayurveda)