Love is the answer

Usa sa mga awit nga dili gyud nako makalimtan niadtong college pa ko mao ang awit nga nag-ulohan og; “LOVE IS THE ANSWER.” Sa maong awit napatik kining maong tudling: “Love is the answer to so many questions now I know so I can stop my endless wand’ring, Love gives the meaning to my world, I see the answer now!”

Gipahinumdoman kita sa Ginoo sa usa ka mahinungdanong tahas ug sugo alang kanatong iyang mga sumusunod sa pagpuyo sa kinabuhi sa gugma. Lisud kaayo kining sugoa sanglit daghan man kanato ang pakyas diha sa pagtagamtam niini o dili ba kaha sa pagpaambit niini ngadto sa uban. Mao nga daghan gihapon kanato ang nagpuyo sa kinabuhing walay bulok ug kahulogan sa simpleng rason nga midumili kita sa paghigugma ug pagdawat sa gasa sa gugma. Ang tinud-anay nga gugma alang kanako ang molangkob ning mga mosunod nga kinaiya: Andam nga Maminaw, uyon nga modawat ug mobati sa tawo nga gihigugma, isog nga moaninaw sa dili pa mohatag og hukom, ug labaw sa tanan, maantigong mobati sa gibati sa gihigugma. Love until it bleeds matud pa nila sanglit ang tawong mahigugmaon dili magsapayan nga ang iyang gugma pagabaslan og pagluib. Risgo ang mohigugma apan pinaagi lamang niini mamahimo kitang magpuyo sa kinabuhing makahuloganon.