"Good day. Naa unta koy ireklamo kabahin sa terminal diha sa Hagnaya. Purya saway lang anang terminala kay imbes nga magdali kag kanaog gikan sa lantsa para makalingkod dayon ka sa bus pero dili dayon ka makalingkod kay ang mga dispatser moingon nga nakareserba na kuno ang mga lingkoranan. Purya gaba lang gyod nang mga dispatser diha ug uban pang mga estambay nga mag-apil-apil pod. Layo ra gyod kaayo nang terminala sa Santa Fe terminal kay bisan sa kadaghang pasahero hapsay man gyod kaayo ang tanan." -- 0905-2230481 (Sent: 01:39:20 pm November 2, 2008)
Sa akong analysis sa text sa atong texter, masabot nga gihasolan siya sa modus operandi sa mga dispatser diha sa Hagnaya terminal. May punto ang atong texter.
Angay palamboon ang sistema sa terminal sa Hagnaya aron hapsay ug dili magkaguliyang ang mga pasahero. Usa sa angay buhaton mao ang pagbadlong nianang mga dispatser nga maghimog tinonto.
Samokan man gyod nang mga dispatser, ba, bisan asa pa kana sila ibutang sa Ginoo! Imbes makaabag ug makaalalay unta sila sa mga pasahero, nakadugang na hinuon sila’g kahasol! Pastilan!
* * *
Daghan ang nahisagmuyo sa proyekto sa KALAHI-CIDDS sa Tambo, Mabini, Bohol. Sa sinugdan god, nabaniog nga maoy plano nga usa ka box culvert ang tukoron sa sapa sa Sitio Bagacay sa maong barangay.
Pag-angdo pa, mga imbornal ray gibutang sa sapa. Nabalaka na hinuon karon ang mga molupyo sa Tambo kay sa higayon nga mobundak ang kusog nga ulan, seguradong maglunop gayod ang tibuok barangay.
Gi-underestimate ra sa engineer ang kadako sa tubig nga moagi sa maong sapa nga magdalag dagkong mga gapnod ingon sa mga lindog sa saging, kagingking, batang ug uban pa nga seguradong makabara sa imbornal nga daan nang dili makaato pagsuyop sa tubig. Inigkabara sa tubig sa may imbornal, seguradong mosuyla ang baha ug lunopan ang tibuok Tambo.
Walay pulos ang maong proyekto. Nag-usik-usik lang sa kuwarta. Nag-among-among pa gyod sa mga molupyo sa Tambo, Mabini, Bohol!
(Sumbong ug reklamo? Text sa 0910-8105522).