Human sa pagkasikop sa duha ka taga-City Hall kinsa giakusahan nga mamaligya’g mga peke nga business permit, si Konsehal Augustus Pe mipahibawo nga duna pay uban mga fixer diha sa City Hall nga gipanid-an.
Kay nahibaw-an naman kini, maayo unta nga tinud-on ang pagpaniid niini ug aron masikop sa hingpit. Hiyawat na lang mamenusmenosan ang korapsiyon diha sa kagamhanan sa siyudad.
Hasta si Mayor Tomas Osmeña miangkon kaniadto nga dunay korapsiyon diha sa City Hall ug iyang gipaninguha nga masulbad kining problemaha.
Karon manghinaut kita nga kining giingon ni Konsehal Pe nga gipanid-an ang mga kurakot diha sa City Hall dili lang kutob ra sa pagpaniid kundili tiwason gayud kini hangtud mangasikop ang sad-an.