Pakigol show

Gitinood gyod ni Gobernadora Gwendolyn Garcia ang iyang bahad ngadto sa mga gustong magpasiugda og bikini open sa lalawigan sa Sugbo. Kaniadtong Martes gipasakaan og kasong kriminal sa kagamhanan sa lalawigan ang nagpasiugda sa bikini open ug ang tag-iya sa beach resort sa lungsod sa Santa Fe diin didto gipahigayon ang show kaniadtong Sabado. Matud pa sa gobernadora nga law-ay ug bastos ang pasundayag nga gipasiugdahan didto sa lungsod sa Santa Fe sa isla sa Bantayan. Apan gihimakak sa nagpasiugda nga bastos ug law-ay ang ilang pasundayag. Matud pa sa nagpasiugda nga bisan sa 30 ngadto sa 45 minutos nga photage sa pasundayag dili kuno nimo makit-an ang bastos ug law-ay nga hitabo. Mao lagi ni! Tungod sa maong hitabo, murag mabanhaw na usab karon ang lantogi kun unsay bastos ug law-ay sa usa pero dili kini para sa uban. Para sa gobernadora law-ay ug bastos ang gihimong pasundayag pero para sa nagpasiugda dili kini bastos ug law-ay. Na, hala kamo nalay hukom kun kinsa ang sakto tali sa gobernador ug sa nagpasiugda.

* * *

Akong giyokboan ug gisalodohan ang gobernador sa iyang gihimong pagpanalipod sa dignidad sa kababayen-an nga dili niya gustong himoon lamang komodity sa uban. Pero mas maayo seguro nga dili lang pili-on sa atong gobernadora ang iyang totokan. Kun supak man siya sa pagpahigayon og mga bikini open nga iyang giingon nga bastos ug law-ay, iya usab untang supakon ug gukoron ang mga magpasiugda niining mga beauty pageant diin ang mga kandidata papasopasohon nga naka two-piece. Pugngan usab unta sa gobernadora nga dili mapasalida sa mga sinihan dinhi sa Sugbo ang mga salidang bastos ug law-ay.

* * *

Ngano kahang mikalit man lang karon og saba-saba ang gobernadora sa mga bikini show nga hilom man unta ni siya sa milabay’ng mga katuigan? Nakita kaha ni niya ug sa iyang mga political handler nga maayong sakyan alang sa iyang subling pagpapili pagka gobernadora sa lalawigan sa Sugbo? Manghinaut lang ko nga ang pagsaba-saba sa gobernadora mahitungod ning mga law-ay ug bastos nga pasundayag tininood ug kinasingkasing kini niyang gihimo ug dili lamang unta aron mahumot siya ngadto sa kababayen-an.