Morag sige pa diay ang Cha-cha!

Ang taga-oposisyon, miingon nga gilingaw lang kono ang lungsod sa istorya-istorya sa 2010 election. Bisan ang partido sa administrasyon, milihok na konohay. Unya, duna say lineup konohay sa mga probable senatorial candidates.

Ang Comelec sad sige na konohay'g pangandam sa ilang giingon nga dili kapugngan nga eleksiyon.Ug ang Lower House mi-approve na sa budget nga maggahin og 11.3 bilyones ka pesos alang sa automation sa umaabot nga eleksiyon.

Karong bag-o dinhi sa Sugbo si Erap, ug matud niya, kun dili mahiusa ang oposisyon, kaylagi, sila si Loren, Escudero, Lacson, Villar, Roxas, ug Binay gusto gyung mag-presidente. Walay usa kanila miingon nga mag-bise lang. Presidente gyud. Maoy hinungdan nga namahayag si Erap nga mapugos siya paglansar, if only to unite the opposition.

Ug ang ubang mga nangambisyon nga mag-presidente, mihinay-hinay nag suroy sa mga major cities sa nasud. Sa nangaging mga semana, dinhi sila si Loren ug Roxas. Ug ang uban mangita gyug mga paagi nga makakorte sa bisan unsa nga isyo aron lang gyud ma-headline.

Sa ato pa, hapit na matunga ang tuig 2009, ug tapus sa Lent, magkainit na ang isyo political, magka-klaro na kinsa gayud ang bendisyonan ni Gloria ug kinsa ang ma-standard bearer sa oposisyon.

Apan, samtang mao kini ang talan-awon, giingon nga ang mga Gloria Congressmen, nagpadayon diay sa ilang mga tinguha nga ilahos gyud ang Cha-Cha. Si Makati Mayor Jejomar Binay, presidente sa United Opposition, nabalaka nga sulod sa usa ka bulan nga Lenten break sa Kongreso, lihokon nila ang makinarya pagpahinayon sa Cha-cha. Gani karon, morag ilang ipadayon ang plenary debate bahin sa kang Speaker Nograles nga Resolution 737 sa panginahanglan pag-amendar sa Constitution specifically bahin lamang sa economic reforms.

Ug ang mga Gloria Congressmen, giingon nga naglaraw nga ilang isang-at sa Korte Suprema ang Cha-cha issue, kay matud ni Binay, pito ka Justices ang mo-retire karong tuiga, ug nahadlok siya nga ang ipuli mga sympathizer sa Presidente, ug tingalig mouyon sa Cha-cha.

Anyway, being an oppositionist, ug nangambisyon nga mopuli ni Gloria, dili kaayo ta makatuo, hook,line and sinker sa mga pahayag ni Binay. Miingon ang Palasyo nga kun unsa man kono ang mga kalihokan sa Lower House, walay labut ang Malacañang, kun ila kining independent act sa mga Representante. Kinsa may imong tuohan ini, Dro?