Bastos nga mga traysikad drayber

Kinsa bay presidente sa mga traysikad driver nga anaa mag-operate sa pagpamasahero diha sa pier area?

Mas maayo nga motimbakuwas ka’g bangon ug subayon ang binuhatan sa pipila ka traysikad drivers diha sa pier nga gireklamo sa mga pasahero kay bastos ug walay batasan, dili makamaong mopadayag og kortesiya ngadto sa pasahero.

Sumala sa pipila ka pasahero nga mipadangat nako’g text, adunay mga traysikad drivers diha sa pier area nga magbugalbugal sa mga pasahero labina’g babaye. Wala hinuon idetalye sa mga reklamante kon giunsa sila pagbugalbugal pero the fact nga nisumbong ug nireklamo sila, nagpasabot kini nga wala sila mahimuot sa conduct sa maong mga driver.

Labaw sa tanan, angay sumpoon kanang ilang modus operandi nga tag P20 ang paningil matag pier. Kadakong binuang niana! Labaw pa man kana sa tulis sa atubang!

May mga dokumento bang ikapakita kanang maong mga driver nga magmatuod nga legal ang ilang pagpaningil og plete nga tag P20 kada pier?

Dili kay kana ra. May mga pasahero sab nga nangreklamo kay inigkanaog nila sa PUJ o taxi, mosugat nila kining mga traysikad drivers nga mangilad nila diha sa may Pier 3.

Pangutan-on (kuno) sila sa mga traysikad driver kon unsang barkoha ang ilang sakyan. Human sila makatug-an, moingon ang traysikad driver nga wala na sa Pier 3 ang lukatanan og ticket sa barko kondili tua na (kuno) sa Pier 1. Dayong tanyag nga mosakay sa iyang traysikad aron ihatod ang pasahero ngadto sa Pier 1 aron paglukat og ticket.

Pag-abot sa Pier 1, masuta sa pasahero nga wala diay didto ang lukatanan og ticket sa barko nga iyang sakyan. Sa ato pa, giilad lang siya sa traysikad driver aron lang gyud kini makapasahero. Pastilan!

Dili maayo ning maong practice sa mga traysikad driver diha sa pier area. Kinsa bay makabadlong nila? Ang presidente sa ilang kahugpongan (kon aduna)? O ang barangay kapitan nga nagsakop nianang lugar nga ilang gipamasaheroan?

Palihog, aksiyoni!

 (Sumbong ug reklamo? Text sa 0910-8105522).