Si Pastor Leo ba ang kriminal?

Sa kamatayon sa iyang asawa nga si Judith, biktima ba si Pastor Leonardo Jastiva sa krimin o siya ang kriminal?

Kun ang police maoy pasulti-on, si Pastor Jastiva mao ang kriminal gumikan sa mga circumstancial nga mga ebidensiya nga nahipos sa ilang pag imbestigar sa kaso maong ilang gidakop, gitanggong ug gipasakaan og kaso niadtong miaging semana ang Pastor.

Apan ang pagdakop, pagtanggong ug pagpasaka og kaso batok sa Pastor bunga gyod kaha kini sa makuting imbestigasyon nga gihimo sa mga police sa dakbayan sa Sugbo? O bunga lamang kini sa paningkamot sa mga police aron matakpan ang ilang kapalpakan?

Si Pastor Jastiva gibaliwala ug gipasanginlan sa mga police nga nagdrama lamang sa dihang midangop kini kanila aron magpakitabang dihang gidagit ang iyang asawa. Wa man lang gani mohimo ang mga police og makuting pakisusi sa wa pa nila pasanginli ang Pastor nga igo lamang nagdrama. Sa laktod, wa tuohi sa mga police si Pastor Jastiva. Apan siyam ka adlaw human baliwalaa ang Pastor sa mga police, napalgang patay ang lawas sa asawa niini sa usa ka hilit nga dapit sa Barangay Tabunan ning dakbayan.

Ang labing sakit, human siya baliwalaa ug pasanginling nagdrama, gidakop si Pastor Jastiva kay gipasanginlan na usab sa mga police nga mao ang kriminal sa linoog nga kamatayon sa iyang asawa.

Ang kamatayon sa asawa dili kaha maoy nagtukmod sa mga police pagdakop, pagtanggong ug pagpasaka og kaso batok sa banang Pastor aron tinuoron ang ilang tiyorya nga nagdrama lamang ang Pastor (bisan dili tinuod) aron matabunan ang ilang kapalpakan?

Hinuon dili ikalimod nga aduna usay mga lihok nga gipakita ang Pastor ngadto sa mga Police nga makapaduda. Apan dili pa ko kombinsido sa mga ebidensiya nga nahipos sa mga police batok sa Pastor busa kinahanglan pa kining palawman aron makuha ni Judith ang hustisya. Magkondinar man ugod ug dili malipay ang biktima sa krimin kun ugaling maoy gitaral sa hukmanan ang way labot sa krimin.