Video karera sa Warwick-Barracks

Gibalik na usab ang mga video karera sa Warwick-Barracks, Ermita. Atensyon mga polis sa Carbon. Ang report nga miabot nako anaa kini sa balay nilang Enar, Inday, Galy, Glenda, Virgie, ug Fredo.

Palihug sa ubang mga informers nga mo-report kun ibalik na ang maong mga "video karera" ug "moli-moli" diha sa inyong mga dapit.

Adto i-text sa among news desk. Nakabantay hinoon ko nga ang uban natong informers mahadlokon kaayo.

Ayaw mo kahadlok kay akong ipasalig nga dili g'yod mahibaw-an ang inyong mga numero. Walay makakita sa inyong mga mensahe gawas ra sa akong sinaligan ug nako.

* * *

Nakabantay ko nga daghan kaayong mga drayber sa mga sakyanan nga ponder ang headlights, samtang ang ubang drayber tuyoon g'yod nila pagpawong ang ilang headlights kun magpadagan panahon sa gabii.

Nalipay kaayo ko kay paspas na karon ang operations sa Land Transportation Office pinaagi sa iyang mga deputized agents - ang Task Force Alpha - nga manakop sa mga masalaypong drayber.

Katulo sa usa ka semana nga ang mga sakop sa LTO-Task Force Alpha mohimo og operation sa lainlaing dapit sa dakbayan. Ang nakalahi sa TFA kay sakmiton g'yod ang lisensya sa mga drayber nga masakpang nakahimo og salaud.

Kaniadtong Biyernes sa gabii, mi-standby ko bali'g kapin sa usa ka oras sa Gorodo Avenue ug nabantayan g'yod nako nga pwerteng daghana nga sakyanan nga nagdagan nga walay headlights.

Unya, pahimangno nako niadtong mga drayber nga parahon sa Task Force, ayaw g'yod mo pagsuway nga mosibat kay mosamot ang inyong salaud.

Sama niadtong usa ka batan-ong drayber nga nag-motor nga dihang gipara kay ang iyang motor walay side mirror, unya ang iyang angkas walay helmet, dayon ang drayber nagsinilas, mipasirit hinuon.

Busa kamong mga drayber nga dunay deperinsya ang inyong headlights ug ubang lighting facilities, ilabi na kadtong moagi sa Gorordo Avenue, ayoha na lang nang daan.

Ang paspas nga kampanya karon sa Task Force Alpha naggumikan ni sa awhag ni LTO-7 regional director Raul Aguilos nga hingusgan ang pagdisiplina sa mga masalaypong drayber.

Ang ako lang ikapasigarbo mao nga sa operation sa Task Force Alpha, walay makasulti nga ang mga agents mangilkil. Kun duna man gani, hala itawag sa among Banat News desk - 0917-3836645.

* * *

Usa ka Citom enforcer ang nahinabi nako gahapon og mituki sa nabasahan niya sa akong lindog.

Miingon kini nga si Arnel Tancinco pirmi man diay nga makakita sa building diha sa eskena Tres de Abril ug Natalio Bacalso Avenue nga wala motuman sa tukma nga parking, apan gitan-aw ra.

Tiaw mo na Arnel, hasta ang kaugalingon mo nga sakop nakabantay na sa imong pagkawalay pulos kay pinili ra ang pagpatuman nimo sa balaud.

Nakahigayon mi'g estorya gahapon sa traffic enforcer kay minus ra ang traffic congestion.

Kana kunong dapita angay g'yod nga estriktohon ang parking style nga dili "diagonal" apan gitan-aw rang Arnel. Kanus-a kaha batia og kauwaw kining tawhana no?

Walay lalis bag-o g'yod na nga building Arnel ug angay'ng motuman sila sa gilatid nga parking style nga dili pinaigwad ngadto sa karsada ang pag-park aron dili makabalda kun mogawas na, apan imo rang gitutokan.

Daghan pa kaayo nga building nga ingon niini nga sitwasyon apan kini si Arnel nagkyogpos lang.