Hangyo sa texter

"Good day. Naa lang koy hangyo diha sa lungsod sa Minglanilla nga pabutangan og garbage can kada barangay kay ang uban anha man maglabay og basura sa bakanteng lote. Naa gihapon ang dengue sa Minglanilla." -- 0906-8459147

Lehitimo kining hangyo sa atong texter. Hinaot unta nga hatagan kinig dakong pagtagad sa mga nahingtungdan.

Bahin sa dengue, usa sa paagi aron masumpo kini mao ang pagpanglimpiyo. Apil na niini ang hustong paghipos sa mga basura.

Atong tumanon ang R.A. 9003 kon Ecological and Solid Waste Management Act.

* * *

Naghisgot na man gyod tag basura, pahimuslan ko nalang sab ang paglakbit bahin sa merkado sa Ubay, Bohol.

Limpiyo man ang merkado sa Ubay. Apan bisan pa man niini, daghan gihapon ang nagreklamo nga kulang ang butanganan og basura sa merkado.

May mga dapit sulod   o gawas sa merkado nga walay basurahan. Hinaot untang maadres kini.

* * *

"Good AM, Sir. Naay mangunguot diha sa Mandaue City, partikular na sa Wireless, Subangdaku ug dapit sa may NTC. Mga upat ngadto sa lima ka tawo. Dagkog lawas. Ilang iatol sa oras nga tingsakay, mosabay-sabay sila sa mga pasahero. Kun naa na silay makursonadahan nga biktimahon, ila dayon piitpiiton inigsakay. Ang duha maoy mag-una ug mag-ali-ali sa pultahan sa PUJ unya ang ilang kauban nay momaniobra pagkuot sa luyo sa ilang biktimahon. Mga salbahis sila. Duol ra man unta nig presinto sa polis pero wala man sila mapakgang." -- 0928-7494014

Daghan salamat sa impormasyon nga imong gipadangat, higalang texter. Hinaot unta nga pinaagi niini, makabantay ang atong kaigsuonang sumasakay og PUJ.

Angay sikopon sa mga awtoridad kining maong mga mangunguot. Pero mas maayong dili kita mohatag og higayon nga makabiktima sila ni bisan kinsa kanato. Labing maayo nga mag-amping ug magbantay gyod kita kanunay.

* * *

 (Sumbong ug reklamo? Text sa 0910-8105522).