Ipatuman sa Dangerous Drugs Board sa sunod bulan ang mandatory drug testing sa tanang mga tinun-an sa tibuok nasud.
Programa kini nga angay ikahinangop, apan nakadawat og pagsaway sa pipila ka mga sektor, usa na niini mismo ang ahensiya sa gobyerno nga Commission on Human Rights.
Ang maong programa nakalatid sa balaod. Ang Akta Republika 9165 nagmando sa pagpaubos og drug testing sa mga tinun-an.
Sa pagkabasa nako og balita mahitungod niining maong laraw sa DDB, nakapanghinaway ko. Sama sa pangagpas sa National Union of Students of the Philippines (NUSP), nagtuo usab ako nga mga pribadong drug testing company lamang ang makakuwarta sa programa samtang mausik lamang ang minilyon ka pesos nga pundo gikan sa buhis sa katawhan.
Sa dihang nabasahan nako ang tumong sa DDB, nakasabot hinuon ko nga gikinahanglan diay ang drug testing sa mga tinun-an, ilabi na nga ang ilegal nga drugas nakapa-adik na sa libuan ka tinun-an lukop nasud.
Human sa drug-testing ug mahibaw-an nga ang usa ka tinun-an positibo sa ginadiling drugas, dili tumong sa DDB ang pagdakop ug pagtaral kanila sa hukmanan.
Nalipay ko nga ang tumong diay sa DDB mao ang pagpa-ubos sa mga na-adik nga mga tinun-an sa ‘counseling’ aron tambagan sila nga likayan na ang ginadiling drugas ug magpuyo na isip tarong nga molupyo sa katilingban.
Nindot kaayo kini. Mahulog nga usa ka maayo nga ‘approach’ ang programa sa DDB pagsumpo sa ginadiling drugas.
Kanang mga paninguha sa mga law enforcement agencies – Philippine National Police, National Bureau of Investigation ug Philippine Drug Enforcement Agency – pagpuhag sa mga druglords pinaagi sa pagsikpaw ug pagtaral kanila ngadto sa hukmanan, magmakawang lamang kun dili kini atbangan og programa pagluwas sa mga nagumon ug nabiktima sa ilegal nga drugas.
Nadawat na nato ang kamatuoran nga hilabihan na ka gamhanan sa sindikato sa ginadiling drugas. Gani, lakip na ang politika ila nang nasudlan, mao man bitaw nga aduna kining “narcopolitics” nga matud pa, salapi niini makapadaog sa mga pinili niining mga kandidato.
Dili usab matago sa maong mga ahensiya nga, gawas nga naglisud sila sa paggukod sa mga negosyante og drugas, ilabi na nianang shabu, giduwaan usab sila sa korupsiyon sa ubang mga ahensiya. Tan-awa ninyo unsay nahitabo sa kaso sa Alabang boys, minilyon na ang gihisgutan nga kantidad nga gisuborno ngadto sa mga opisyal sa Department of Justice aron mamaniubra ang kaso.
Busa, sulayan nato ang ‘approach’ nga ilusad sa DDB, basin makatabang kini pinaagi sa pagtambag sa mga adik nga mga estudyante pagbiya na sa drugas.
Kun usa ka gatus ka mga tinun-an ang hingpit nga motalikod sa shabu tungod sa counseling human ma-positibo sa drug-testing, dako-dako na nga kantidad ang mawala sa mga drug pushers.
Kun magkadaghan kada adlaw ang matabangan sa counseling, inanay nga mamatay ang negosyo sa mga drug lord.
Kay naglisud man kita sa pagpakigharong batok sa mga gamhanang drug lord, balihon nato ang stratehiya. Ang ilang mga biktima ang atong birahon gikan nila, ug atong tabangan nga hingpit talikdan ang drugas ug pabarugon nato pagtabang sa kawsa batok sa ginadiling drugas.
* * *
Nalipay ko nga na-award na sa Joint Venture Selection Committee sa kagamhanan sa dakbayan ang 50 hektaryas sa South Road Properties aron ugmaron sa Filinvest.
Makakita na gyud kita og dakong kausaban diha sa SRP. Magsugod na unya ang pag-ugmad sa 50 hektaryas nga ‘covered’ sa joint venture agreement tali sa Filinvest ug kagamhanan sa dakbayan sa Sugbo.
Ang labi nako nga gikalipay mao ang pagbukas unya og daghang trabaho diha sa SRP.
Dili angay maguol ang Kapitolyo nga na-award ang 50 hektaryas nga mao ang sama nga 50-hektarya nga ilang nakit-an ug gustong ugmaron. Hilabihan pa kalapad sa SRP ug aduna pay mas nindot nga luna nga mahimo nilang palambuon.
Karon nga ang Filinvest na ang gihatagan og katungod sa dakbayan pag-ugmad sa maong 50 hektaryas, maayong pasagdan na lamang kini sa Kapitolyo ug imatuod nga sayop ang pagtuo sa kadaghanan nga panglawgaw ug pangsamoksamok lamang batok sa City Hall ang ilang tuyo.
Dili na lamang nato lalisan kun sakto ba o dili ang pagpamugos sa Kapitolyo. Ang akong gi-ampo nga makatrabaho na ang daghang mga Sugboanon pinaagi sa kaugmaran sa SRP.
Nakadawat na ra ba kita og text messages nga nagkuwestiyon kanato nganong si Gobernador Gwendolyn Garcia akong gisigehan og basol sa isyu sa SRP.
Igo ra gyud ko nagpresentar og isyu. Sakit lang paminawon basta sakto.
Pastilan!
Kaniadto hilabihang nakapanaway sa mga Garcia sa SRP kay naputos og utang; karon gusto silang mobubo og puhonan sa samang proyekto nga gisigehan nila og saway kaniadto?
Ang 50 hektaryas nga nagustohan sa Filinvest mao usab ang ilang gustong kuhaon. Nganong kana man gyud nga luna nga sudlan sa Filinvest nga lapad man kaayo ang SRP? Dili ba panglawgaw lang gyud?
Kining atong Tikdol pinobre ra man kini. Tingale, usa ko sa nagpunay og presenter sa isyu batok sa mga Garcia nga giatbangan og daghang mga blocktimer nga kanunay’ng nag-aleluya ni Gwendolyn ug magpunay og bira nako sa radyo.
Pero wala ko mahadlok bisan unsaon ko nila og ‘discredit’ kay ang mga tawo nasayod man unsa ang husto.
Dili buringog ang tinuod nga mga Sugboanon.