Legacy ni Gloria: Clean 2010 elections

Sa latest survey nga gihimo sa Social Weather Station bahin sa 2010 elections, 92% sa mga Pilipino buot nga mag-automation ang nasud sa umaabot nga presidential election. Kini, aron kalikayan sa hingpit gikahadlokan nga massive panikas matag eleksiyon, ma-local o ma-nasyonal.

Si Comelec Chairman Jose Melo, sa atong pagsulat niini, mibutyag nga gihikay na sa Malacañang ang supplemental budget nga isumitir pag-resume sa session sa Kongereso karong Enero 19, alang sa computerization sa 2010 elections.

Kun mao, nagpasabot nga dili diay tinuod ang speculation nga kuno dili buot ang Malacañang nga mag-eleksiyon sa 2010, nga buot lugwayan ni Gloria ang iyang termino, ug labaw pang dili tinuod nga mag-chacha gyud.

Si Melo nangusog nga ipadayon gyud sa Comelec ang automation. Sa iyang bahin si Senador Richard Gordon nagkanayon: “There are a lot of rumors circulating that the supplemental budget for poll automation has not been released apparently because of Cha-cha or President Arroyo extending her term.

“But all these accusations would dissipate once people see that the government is really working to have honest, speedy and reliable elections through the automation of the electoral system.”

Sa ato pa, kun mahinayon gyud ang eleksiyon, unya, mag-automation, ug mag cross-matching aron kalikayan ang flying voting, atong masabot nga maoy tinguha ni Presidente Arroyo nga ma-linis ang 2010 nga eleksiyon, ug kini maoy mahimo niyang legacy nga ibilin pagkatapus sa iyang term. Mao kini ang awhag sa mga senador.

Ug kun mao man kini ang mahitabo sa umaabot nga eleksiyon, diin walay bisag usa ka Pinoy ang makaingon nga gi-Garci ang eleksiyon, walay makaingon nga gi-magic sa Comelec ang resulta sa eleksiyon, walay makaingon nga di kamaong moihap ang Comelec, walay makaingon nga gipalit ang Comelec, ug walay bisag usa ka Pinoy ang makaingon nga iyang gibaligya ang iyang boto – kun mao kini ang mahitabo sa eleksiyon, ang tibuok nasud, magmapasalamaton kaayo kang Presidente Arroyo, nga diay mahimo sa Pilipinas ang usa ka malinis nga eleksiyon.

Nganong di man ni nato mahimo, Dro?

Manghinaut kita nga niining sinsero nga intention sa atong presidente, dili siya magpadala sa mga hunghong sa iyang mga alalay, kinsa buot dili gustong kapulihan sa gahom.