Babae kong apo’y makulit sa lahat
Sa pitong apo kong sa bahay ay hiyas;
Ang apo kong ito’y maraming palabas
Siya’y kumakanta -– malakas umiyak!
Siya’y bunsong anak ng anak kong bunso
Siya ay morena kuha sa kulay ko;
Tatlong taon pa lang nag-aaral ito
Kaya sa eskwela ay hatid at sundo!
Kapag walang sumpong siya ay masaya
Daldal na nang daldal pasayaw-sayaw pa;
Ang kanyanmg favorite si Hannah Montana
Kaya sa pagkimbot mahusay talaga!
Subali’t kung minsan siya ay masungit
Si Lolo at Lola ay kinakagalit;
Kanyang kuya’t ate ay di makalapit
Sa mama lang niya siya’y nagbabait!
May mga sandaling kami’y nag-uusap
At sa aking kwarto ay kalat nang kalat;
Sa inaasal n’ya ako’y nagagalak
Lalo’t walang sumpong kami’y nagsusulat!
Paborito niya na aming gagawin
Magkulay sa libro at saka mag-drawing:
Rectangle, triangle paboritong gawin
At saka serene na si Aquamarine!
Sa kanyang pagdating mula sa eskwela:
“Di ako nag-cry!” sasabihin niya;
Sa ganitong siste ako’y nagtatawa
Kaya ang ganti ko “Magmu-mall kita!
At saka kung ako’y pupunta sa bayan
Kanyang pasalubong di nalilimutan;
Strawberry Donut at Chowking Yang Chow
Naku kay gana po’t mabigat ang timbang!
Kung kayo’y may apo na katulad niya
Hahaba ang buhay kahi’t matanda na;
Sa gulang ko ngayo’t ng aking asawa
Siya ay ligayang walang pangalawa!