Tau Gama ug Akrho

Nalipay ko nga nagbasa sa balita nga nag-ulohan “Akrho, Tau Gamma to lead cleanup for graffiti-free city” nga migawas sa The Freeman sa miaging Sabado.

Sa maong balita, si Konsehal Ritchie Osmeña nagkanayon nga ang duha ka fraternity – Alpha Kappa Rho ug Tau Gamma Phi – misaad nga motabang sa pagpanglimpyo sa mga graffiti human sa kasaulogan sa Sinulog.

Dili lang tingale ako lamang ang nakadayeg ug nalipay niining maong kalambuan. Nagtuo ko nga ang kinatibuk-ang Cebu nagdamgo nga magkabayloay na og kalinaw ang Akrho ug Tau Gamma.

Kun matinuod kini, mangita gyud ko og paagi sa pagsaksi sa mao unyang pagpanglimpyo tungod kay usa kini ka “achievement” sa duha ka fraternity nga angayan natong masaksihan ug mahibaw-an ang paghangop nila sa ilang responsibilidad sa sosyedad.

Ang pagka-sinsiro sa Akrho ug Tau Gamma mabati na nato sukad sa nakalabay nga mga bulan. Wala na kita makadungog og mga balita nga adunay sakop sa Akrho nga gipatay ug miyembro sa Tau Gamma, Tau Gamma gipatay sa Akrho.

Samtang nagkasinabot sila nga maghiusa aron limpyohan ang siyudad sa Sugbu gikan sa mga hugaw’ng graffiti nga gipang-spray sa mga bongbong ug paril.

Dayegon nato ang ‘intervention’ nga gihimo sa mga opisyal sa dakbayan ug sa kapolisan. Sa kanunay nilang pag-host og dialogue, nagbunga kini karon pinaagi sa pagpakahilom na sa duha ka fraternity, paglikay nila sa kagubot ug paghangop sa mga buhat sa kaayo.

Nakapangutana akong mga amigo nganong karon lang nila kini himuon. Apan alang kanako, mas bali nga ulahi na nilang himuon ang paghangop sa kalinaw kay sa magpabilin nga gubot hangtod sa hangtod.

Daghan na ang kinabuhing nakalas kaniadtong init pa ang isigka habig. Gani, adunay mga walay labot nga nangadamay.

Karon nga magsugod na sila og gunit sa tagsatagsa nila ka mga kamot aron magkahiusa, dili lamang kita mangiyugpos aron pagsaksi sa ilang mga buhaton ug angay natong alsahon atong mga kamot ug paghatag og masipa nga pakpak niining dakong kalambuan.

Angay natong dayegon ang mga lider sa Tau Gamma Phi ug Alpha Kappa Rho nga naninguha usab nga mapabugnaw ang tagsatagsa nila ka mga sakop.

Silang Richard Buscaino ug Usec. Clarence Paul Oaminal walay puas sa pagkumbinser sa ilang mga sakop sa pag-laylo sa kagubot ug midangop sa mga buhat sa kaayo sama sa pagpamintal sa mga paril ug paghimo og mga kalihukan nga makapatubo sa responsibilidad sa tagsatagsa nila diha sa komunidad.

Misamot akong pagdayeg sa mga lider sa Tau Gamma. Bisan lisud silang mailhan tungod sa ilang prinsipyo nga magpabilin silang low-profile, ang mga sakop sa Tau Gamma dali lamang nilang nahaylo sa paggakos sa kalinaw ug kahiusahan.

Hinaot pa unta og magpirme na kini.

* * *

Makadadayeg kining pagpakatap og daghang mga traffic enforcer sa mga karsada nga apektado sa panaghuot sa Basilica del Sto. Niño tungod sa kapistahan sa Balaang Batang Hesus.

Malikayan na ang paugat sa mga drayber tungod kay aduna na man kining mga traffic enforcer nga mobadlong kanila sa higayon nga mosugmat kining ilang batasan nga dili motuman sa lagda sa trapiko.

Bisan daghang mga karsada duol sa Basilica nga gipangsirad-an nunot niining selebrasyon sa Sinulog, aduna gihapoy maayong dagan sa kutay sa mga sakyanan sa bisan asang mga karsada.

Nagpabilin usab ang ka-estrikto sa mga traffic enforcer tungod kay gamay nga sayop sa mga motorista, ilabi na kadtong mga badlongong mga drayber sa taxi ug PUJ, dakpon dayon.

* * *

Daghan ang nalipay niining pagbaha sa mga Taiwanese store dinhi sa Metro Cebu tungod kay aduna nay kadangpan nga tindahang barato ang mga pordoy sama nako.

Apan taliwala sa kalipay sa uban, aduna diay naguol sa tago niining pagpanguhong sa mga tindahan nga gipanag-iya ug gipadagan sa mga Taiwanese.

Usa ka negosyante og ready to wear (RTW) garments wala makaagwanta sa iyang kanunay’ng pagka-alkanse tungod sa kadaghan na sa iyang kompetensiya nga mga Taiwanese, mi-text kini kanako ug mipadayag sa iyang nahiaguman nga demalas.

Si Inday nga taga sitio San Miguel, barangay Linao, Talisay city, nagkanayon nga niadto lamang silang Disyembre nakatilaw og maayong halin sa baligya nilang RTW, apan karon gilangaw ang ilang baligya tungod lagi sa nagkadaghan na nga mga Taiwanese.

Naalarma ko niining gitug-an ni Inday. Dili ba diay kitang mga Pilipino ang prayoridad sa gobiyerno pagladlad sa atong panginabuhian.

Apan maayong masayod kamo nga barato ra kaayo ang mga baligya sa mga Taiwanese store dinhi sa Cebu.

Niadto bitaw’ng Nobiyembre 14 hangtod 16, didto ko sa Taiwan uban sa mga inilang personalidad sa media sa Sugbu, sama nilang Bobby Nalzaro sa DySS, Atty. Ruphil Bañoc sa DyHP, Bobit Avila, Jerry Tundag, Rene Borromeo ug uban sa mga opisyal sa Global Power Corp., ug nasota nako nga hilabihang kamahal sa ilang mga baligya gikan sa sapot ngadto na sa mga souvenir items.

Sa paglupad pa lang sa eroplano gikan sa Manila paingon sa Tao Yuan Airport, naghunahuna ko sa mga baligyaanan sama sa mga Taiwanese store sa Manalili, Osmeña Boulevard, Carbon area ug Colon nga mahimo nakong kasuroyan ug kapalitan.

Apan sa ilang night market, kulang ra ang P2 mil aron makapamalit og sapot nga maayo og klase ug brand. Dinhi sa ato, ang P2 mil, usa na ka karsones ug usa ka T-shirt nga adunay brand. Apan sa Taiwan, ang P2 mil nga mobalor lamang og 1,600 New Taiwan Dollar, kulang lang sa usa ka karsones nga mobalor og kapin sa 2,000 New Taiwan Dollar.

Diin kaha gikan kining mga baligya sa mga Taiwanese nga hilabihan man ka barato? Barato apan dili mga pulido?

Alang sa inyong reaksiyon, [email protected].