Kuyawa sa sugyot sa uban uy nga sa buntag sa dili pa sugdan ang pagpahigayon og Sinulog mardigras, si acting Cebu City Mayor Michael Rama paambakon sa kahanginan sa gitas-on nga 10,000 feet.
Ang sugyot mao nga si Rama, ilambigit ni siya sa lawas sa usa ka Australian sky diving expert nga giingong ania karon sa Sugbo. Gipatan-aw ko ni Konsehal Jack Jakosalem sa video footage sa pag-dive sa maong langyaw.
Gikan sa luksoan nila nga chopper, moambak sila nga dili pabukharon ang parachute kon parakayda hangtud nga moabot na sila sa 3,000 feet na lang gikan sa yuta.
Grabeha no. Kun ako tingali, kuyapan ko ana sa kasanaw. Kun dili mobukhad ang parachute, sa gilay-on nga 10,000 feet ang tawo upog-kupog g’yod kun anha madakdak sa gahi nga dapit.
Usa tingali kini sa gipasiatab sa mga opisyal sa Sinulog Foundation nga daghan sila og mga bag-ong talan-awon karong tuiga kun itandi sa nangaging kasaulogan.
Sayod hinuon ko nga balibaran sa mayor kining maong sugyot.
* * *
Ang pagpahigayon og tigbakay, giisip sa uban nga lisud na g’yod sulbaron kay kuno kabahin na kini sa atong kultura.
Apan kun kining maong illegal nga kalihukan anha himoa sa sulod mismo sa compound sa barangay kapitan mora’g dili kini maayong tan-awon.
Ang gipasabot nako mao ang report nga may tigbakay sulod sa compound ni Kapitan Lauron sa barangay Caretta gikan niadtong Pasko ngadto na sa miaging Domingo.
Dunay mga lumulopyo nga duol sa maong dapit nga mireklamo tungod kay gawas nga illegal, hilabihan ang kasaba kun magsultada na ang mga manok.
Nanawag sila og mga polis sa Waterfront police station kay ila mang territorial jurisdiction ang maong dapit diha sa may “Queensland” apan wala g’yoy mga polis nga nanunga.
Klaro kaayo nga nangahadlok kay anaa god kini sa balay sa barangay kapitan. Kamong mga polis, kini maoy isilsil sa inyong alimpatakan ha.
Matud ni acting mayor Mike Rama kagahapon nga kamong mga polis dili angay’ng mahadlok mopatuman sa balaud bisan og ang illegal nga kalihukan anaa pa sulod sa compound sa mga opisyal.
Hain na man kadtong gipasiatab ninyo nga ang kapolisan karong panahona mopatuman sa balaud “without fear and favor?”
Paita ninyo uy, balit-ad man hinuon kay gawas nga nangahadlok mo, duna pa mo’y gipaboran.
Maayo kaha na? Maayo man lang mo’s binahug mga polisa mo. Pwera lang sa mga buotan nga maihap lang.
* * *
Kun tinud-on lang sa mga fire inspector ang pag-inspection sa mga building, pwerteng daghana tingali nga masirad-an kay maisip man nga mga fire hazard.
Nakalugar g’yod kagahapon si Rama sa pagsermon sa mga opisyal sa kabomberohan nga miadto sa iyang opisina isip “courtesy call.”
Kun magluya-luya lagi ang mga fire inspectors, dili g’yod imposible nga ang nahitabo sa Bangkok, Thailand nga dunay night club nga nasunog ug mikalas og sobra sa 60 ka kinabuhi.
Maayo kay gilakip na lang usab ni Rama ang pagpakisayod sa mga opisyal sa kabomberohan kun pila g’yod ang kinatibuk-ang budget sa Bureau of Fire Protection alang sa fire department dinhi sa dakbayan.