Diha sa pagpaabot

DISYEMBRE 14, 2008: Ikatulong Domingo sa Adbiyento

Mga Pagbasa:  Is. 611-2a,10-11/1Tes. 5:16-24/Jn. 1:6-8, 19-28

Mga pila ka adlaw na lang sa wala pa ang akong ordinasyon wala nako hisabti ang akong gibati. Nalipay ko nga nahadlok. Nalipay tungod kay lagi nahatagan og katumanan ang damgo niadtong bata pa nga ako gyud magpari. Kahadlok tungod kay lisud gyud puy-an ang pinari nga pagkapari. Apan bisan pa niana, nalipay gihapon ako kay niabot gyud ang akong gipaabot- ang mahinungdanong adlaw sa akong ordinasyon niadtong Hunyo 20, 2006.

Sanglitanan lamang kini sa usa ka kasingkasing nga nagpaabot sa iyang hinigugmang mithi o binuhat nga moabot. Ingon ini pud tingali ang inyong bation ingon nga mga ginikanan samtang nagpaabot kamo sa pagkahimugso sa inyong anak. Dili ba?

Ning ikatulong Domingo sa Adbiyento (Gaudete Sunday) atong masil-ingan ang personahe sa usa ka mahinungdanong tawo nga si Juan Magbubunyag. Taliwala sa mga kalisud diha sa iyang kinabuhi ug sa ministeryo, si Juan tugob sa kalipay nga nagpaabot sa iyang hinigugmang agalon nga mao ang Mesiyas, ang dinihogang moluwas sa nasud sa Israel gikan sa kaulipnan sa sala. Ang dinihogan nga gisangyaw niya tugob ang tumang kaligdong ug kamatinud-anon. Nahimo siyang tig-una ning mahinungdanong personahe alang sa katawhan nga nagpaabot niini.

Dili ikalimod nga diha sa atong kinabuhing Kristohanon nahimong daw wala kita sa mood samtang nagpaabot kita sa Ginoo ning panahon sa Adbiyento. Kini tungod kay daghan kaayong mga kabalaka ang mihasol kanato. Kini tungod kay nalumsan kita sa mga negatibong panlantaw sa kinabuhi. Sa laktod, daw idlas alang kanato ang paglaom nga human sa kalisud anaa ang kahimayaan. Tinuod lisud ang panahon karon apan wala kini magpasabot nga babagan kita diha sa atong pagtagamtam sa kamaya ning maong pangilin sa Pasko sa Pagkatawo sa atong Ginoo. Busa kinahanglan kitang magmalipayon kay kini baya ang atong Bokasyon!