Tanod padad-on og armas?

Wala g’yod lagi’y problema nga padad-on og armas ang mga tanod basta lisensyado lang ang ilang mga pusil ug duna sila’y special permit nga makadala-dala kini gawas sa ilang panimalay.

Giklaro nako kini tungod kay mibalik na usab kining isyu nga padad-on kuno’g armas ang mga tanod human niadtong hitabo nga usa ka tanod sa barangay Lorega-San Miguel napusilan atul sa checkpoint.

Ang pagka sakop god sa tanod dili man maoy requirement nga ang usa ka tawo katugotan nga makadala-dala og armas. Supak gani usab ko sa sugyot nga ang tanang media padad-on og armas.

Klarohon lagi nako nga ang media, tanod ug bisan ang ordinaryo nga tawo mahimong makadala og armas kun makatuman siya sa requirement.

Wala sa balaud nga abi kay tanod tugotan na lang nga makadala og armas. Gani ang mga kapitan gibutang man g’yod nga makahimo sila pagdala og armas sa ilang barangay, apan “subject to appropriate rules and regulations.”

Unsa man ang gipasabot nga regulations? Ang gipasabot nga regulation mao nga lisensyado gihapon ang armas ug ang sundon mao ang mga lagda sa Firearms Law.

Sa Local Government Code, gitataw usab nga ang mga mayor makahimo pagdala og armas “in their respective territorial jurisdictions” apan wala gani kini magpasabot nga pwede na sila maghupot og armas nga walay lisensya.

Kun tugotan god nga makadala-dala na lang og armas ang mga tanod, mga sakop sa Barangay Intelligence Networks (BIN) nga walay lisensya, mawala nay bili ang Firearms Law.

Kay mahimo na man lang nga sila magpasakop sa tanod o kaha BIN aron lang sila makahupot og armas. Mao man gani kini ang giapas sa ubang nagpasakop sa BIN.

Kun gusto sila nga moserbisyo sa katawhan isip mga anti-crime volunteers unya ganahan sila nga magdala og armas, aw magpalisensya sila’g armas.

Hilas man god kaayo nga magdala-dala kamo og armas, sama sa ubang mga asset sa polis ug law enforcement units, nga ang armas walay lisensya ug gigamitan lang og memorandum receipt.

* * *

Unsa to, dunay lakang karon nga usbon ang atong batakang balaud? Kuyawa no kun ibalik nila ang karaang tumong nga lugwayan ang termino sa presidente?

Tan-aw nako, angay na nga hulipan si Presidente Arroyo uy. Sigurado usab ko nga sa eleksyon karong 2010, daghan ang motinguha sa pagpapili isip presidente.

Husto na. Ilisan na. Mangita na ta og laing opisyal nga makadumala sa atong nasud. Dunay daghan diha, sama ni Senador Loren Legarda, Mar Roxas, Francis Chiz Escudero ug uban pa.

Gusto nako nga ang usa ka presidente estrikto nga mopatuman sa mga lagda. Kinsa kaha?

Unya, kanang mga politiko nga “balimbing” nga abtik kaayong motapon sa administrasyon kun mahatagan og pabor dili na angay’ng botahan.

* * *

Congrats diay sa akong amigo nga si Atty. Paul Alcazaren, kay gi-promote siya pagka deputy collector for operations sa Port of Cebu.

Unya si higalang Francis Rey “Koko” Holganza wala matarug sa iyang pwesto sa pagka hepe sa Customs Intelligence and Investigation Service, apil na ni Customs police Capt. Isidro Estrera.

Kami god nga mga reporter, sama ra man sa polis, tuyok-tuyok ra ang assignment. Naapil na usab ang Customs sa akong beat sa The Freeman apan tungod sa ka-busy, wala pa g’yod tawon ko makaanha.