Inigsakay mog taxi, ayaw kalimot pag-note sa plate ug body number

Bright gyud kaayo tang mga Pinoy. Pirme tang kadungog nga mga taxi driver tulison sa ilang pasahero. Maoy hinungdan nga daghan nang mga driver ang mahadlok magbuntagay og pamasahero. Risgo na kaayo.

Unya, kadungog sad hinoon ta nga pipila ka mga tulisan ang madakpan, ug ang uban, maka-timing og driver nga dunay ikasukol. Mao say hinungdan nga daghan sang mga tulisan ang mahadlok nag panulis og taxi.

Ug tungod lagi kay bright kaayo tang mga Pinoy, ang mga tulisan nakakita sag paagi pagpanulis sa taxi sa tumang kasayon, nga di kinahanglan mo-resort to killing.

Unsa na karon ang ilang modus?

Usa ka babayeng higala sa lalake nakong anak, misugilon nga usa ka gabii, misakay siyag taxi. Pag-abot nilag medyo mingaw nga dapit, kalma kaayong misulti ang driver ngadto sa iyang pasahero nga cellphone ray iyang gikinahanglan, dala ang pagtion sa usa ka hinagiban. 

Nakalitan ang babaye, wa makatingog, mikurog sa tumang kahadlok (ikaw ba Dro, di kaha ka kuyapan), iyang gitunol ang iyang cellphone ngadto sa driver. Wa na siya makahunahuna pagtimaan sa plate ug body number sa taxi. Besides, kay gabii man, di maklaro ang mga number.

May pagkabuotan sag gamay ang driver kay diha man siya pakanauga sa hayag nga dapit, tungod sa posti.

Mao nga, Dro, inigsakay mog taxi, labi nag gabii, ayawg kompiyansa. Seguroa gyug suwat ang plate ug body number, ug ubang mga butang nga imong matiman-an.

Sa atong mga taxi operator, dili unta sila magpasagad og dawat sa mga driver. Kinahanglan ila unang suhitoon ang mga aplikante. Kay sagad, dili kompleto ang mga kasayoran nga ihatag sa mga driver. Ug lagmit, ang mga operator di lang pod magtagad kun kinsa ang mga driver nga ilang i-hire.

I-background investigate gyug maayo. Unsay complete address; contact number kun duna man (tanang taxi driver morag duna gyuy cellphone); ngalan sa asawa, pilay anak, previous employment – nganong nahawa; ug uban pang mga personal circumstances sa mga applicant.

Mao nga Dro, be extra cautious sa sunod mog sakay og taxi.