"Akong ipapriso si Papa"
Bisan sa linghod nga pangidaron, nasayod na si John nga sayop ang pag-dagmal sa iyang amahan ngadto sa usa ka tuig pa lang niya nga manghod nga babaye. Kini maoy nag-aghat niya pag-sumbong sa kapolisan didto sa lungsod sa Barili aron awhagon nga prisohon ang iyang papa nga si Eduardo Catamin.
Si John, 4 anyos, taga Barangay Campangga, Barili gi-ubanan sa iyang apohan didto sa kwerpo sa kapolisan aron isumbong ang iyang amahan nga midagmal sa iyang manghod nga babaye niadtong Oktobre 27 sa hapon.
Ang bata wa kaagwanta nga nagsud-ong sa iyang manghod nga gilusi ang bugan ug giinat ang panit sa nagkadaiyang bahin sa lawas niini. Ang amahan nga si Eduardo wa pa gyud matagbaw sa pag-dagmal mikuha kini og sili ug gipusa tumong sa baba ug mata hinungdan nga ang bata nakuyapan.
Matud ni John nga ang hinungdan pagdagmal sa iyang amahan ngadto sa iyang manghod mao ang kasuko niini nga wa mopatuo ang bata sa iyang pag-badlong. Hanggaw nga pagka-amahan, unsa kahay iyang gilauman sa usa ka tuig palang nga bata.
Ang maguwang nga nagsud-ong sa gihimo sa iyang amahan ngadto sa iyang manghod siguro buot unta nga manalipod niini apan ang iyang kahuyang nagpugong kaniya hinungdan nga midangop nalang kini ngadto sa iyang apohan nga maoy niuban kaniya didto sa kapolisan.
Natandog kaayo ko sa tubag sa bata sa dihang gipangutana siya sa imbestigador sa kapolisan didto sa Barili kun nag-unsa siya sa ilang opisina. Matud sa bata nga gusto niyang ipapriso ang iyang papa tungod sa pagbun-og sa iyang manghod.
Ang kaso napasaka na sa kapolisan didto sa Cebu Provincial Prosecutor’s Office niadtong Biyernes. Ambot nganong dunay mga ginikanan sama ni Eduardo nga maayo pa ang iyang kwatro anyos nga anak nakahunahuna pa nga sayop ang pag-dagmal sa iyang manghod.
* * *
Naputos sa grabe nga pag-saway sa publiko ang Land Transportation Franchising and Regulatory Board tungod sa pag-hatag lang niini og singkwenta sentimos nga provisionary roll back sa pletihan kini bisan pa sa dako na kaayo nga pagkunhod sa presyo sa krudo ug gasolina.
Ang LTFRB mitugot lang og 50 sentimos ug mipasidaan pa nga mamahimo ning bawion kun mosaka pagbalik ang presyo sa krudo ug gasolina. Taym pa ra gud, hain man kapusta ang LTFRB?
Sa ilang gipakita, tataw nga murag nasuholan sa mga operators ang mga opisyal sa maong buhatan. Kini tungod kay kun ang mga operators gani ang mangayo og usbaw sa pletihan tulin pa sa alas kwatro sila nga mohatag niini.
Apan kun ang mga sumasakay na gani ang mangayo nga us-usan ang pletihan hunit pa sa kubal sa buaya ang mga opisyal sa maong ahensiya. Mohatag man tinuod apan dako pay limos. Nganong di man parehas og tratamento ang LTFRB sa mga operators ug sa mga commuters? Niadtong ang operators maoy nangayo og usbaw ang LTFRB mihatag nila og piso nga provisionary fare increase hinungdan man gani nga nahimong P8 ang minimum nga pletihan.
Kun wa ko masayop, ang piso nga nadugang sa minimum fare niadto nagpabilin na nga provisionary hangtud karon. Nganong wa naman lang tangtanga sa LTFRB ang piso nga provisionary increase nga ilang gihatag niadto ug gibalik sa P7 ang minimum nga pletihan?
* * *
- Latest
- Trending
