Usa ka buntis ang patay sa pinusilay nga nahitabo kaniadtong miaging semana sa barangay Cabungahan, dakbayan sa Naga. Ang pinusilay nahitabo samtang bag-o pa lang nalingaw ang mga tawo nga nagtan-aw sa duwang basketball. Nakahibawo ba mo og si kinsa ang nagpinusilay?
Dili mga sakop sa Creeps ug Bloods, dili upod mga sakop sa Trese Hudas ug Katorse Banal ug labing dili mga sakop sa Akrho ug Tao Gamma ang nagpinusilay. Ang nagpinusilay mao ang “private armies” sa mga politiko sa Barangay Cabungahan nga mura lag nagduwa-duwa og airsoft. Ang pinusilay sa Cabungahan nakapasuspendi sa klase sa mga tinun-an sa elementarya sa maong barangay sa pipila ka adlaw. Gani bisan og gipabalik na ang mga tinun-an sa pagtungha anaa pa gihapon sa ilang mga panagway ang kahadlok ug kabalaka nga motumaw na usab ang laing pinusilay sa mao gihapong grupo sa ilang mga politiko sa barangay. Hangtod karon wa pa madakpi sa kapolisan sa dakbayan sa Naga ang apil sa pinusilay. Unya nalubong na lang ang napagan nga buntis, wa gihapon makapasaka og kaso batok sa mga kriminal ang mga police sa Naga. Mura usab og bao ang ilang imbestigasyon sa kaso. Nganong hinay ang lihok sa police sa Naga ning maong kaso? Tungod ba kay matud pa pulos mga kaalyado sa politika ni Mayor Val Chiong ang nagbanging politiko kansang mga “private armies” nalambigit sa pinusilay? Mao ba kini ang hinungdan nga way plano ang iyang liderato nga padisarmahan, dakopon ug taralon ang maong grupo?
Ang pinusilay sa barangay Cabungahan sa Naga usa unta ka dakong hagit ni Mayor Val Chiong sa paghatag og kalinaw ug kaseguroan sa kinabuhi sa mga mulopyo sa bag-ong nahimugso nga dakbayan. Apan ang kabugnaw sa iyang simod sa nahisgutang hitabo makapaumol sa atong pagduda nga iyang gitogutan ang hitabo nga mausban pa.
* * *
Dako natong pasalamat ngadto ni Senyor Santo Niño nga nagmalampuson ang operasyon sa tumor ni Mayor Tomas Osmeña didto sa Boston sa Amerika. Giingon man ugod nga malignant ang tumor sa bladder sa mayor. Sa wa pa molarga sa gawas sa nasod ang mayor iyang giingon nga iya na lamang isalig ngadto ni Senyor Santo Niño ang iyang kinabuhi. Unya kay nagmalampuson man ang iyang operasyon, makaingon ta nga gipaminaw gayod ni Santo Niño si Mayor Tom.
Pagka maayo gayod sa milagrosong bata. Sayonan mo, bisan og gipasirad-an sa mayor ang iyang pultahan tungod sa kalagot niini sa grupo ni Basan kaniadto, ug bisan daghan kaayo sa iyang imahen kaniadto ang nangaboak ug gipanglabay lang sa dumptruck kay gipademolis sa mayor ang stall sa mga vendors nga iyang gipuy-an, iya gihapong gipaminaw ang sangpit ni Mayor Tom.
Manghinaot lang ko nga ning higayona ilhon na sa mayor ang tabang ni Senyor Santo Niño. Sa iyang pagbalik dinhi sa Sugbu lahi nga Mayor Tomas Osmeña na unta ang atong mailhan ug makita, Mayor Tomas Osmeña na unta nga converted na.