Pagkalisod mag-abogado

Kumusta ug maayong adlaw kaninyong tanan akong mga suking bumabasa ning akong lindog ug sa tanan nga nagmahal ug way puas sa pagbasa ning inyong Banat News.

Tugoti nga magpalahi sa ko ron ning akong lindog tungod kay motug-an lang gyud pod ko ninyo; wa pa koy natuhog nga balita karon dinhi sa Sugbu, gani bisan didto sa kaulohan wa pod ko kahibawo ug unsa nay nahitabo sa kalibutan, diha na lang ko masayod sa eroplano paingon dinhi sa Sugbu nga nagkagrabi na diay ang suliran sa ekonomiya sa Stados Unidos dihang gitunolan ko sa stewardes sa nasudnong pamantalaan nga maoy banner niini ang sugyot nga 700 bilyones dolyares nga bailout nga gibasura ra pod sa ilang kongreso.

* * *

Pagkalisod mag abogado. Karon nakasabot na ko nganong mahal maningil og bayad ang mga abogado sa ilang serbisyo. Nakasabot na ko kun nganong tagsa ray abogado nga manghatag og libreng serbisyo kay dili diay lalim mag abogado. Sayonan mo nianang hapit nalang di mangatulog, kun bation gani og doka bisan unsa na lang ang himoon aron di magdoka sa pagbasa ug di makatulog aron mabasa ang nagtapun-og nga mga basahonon nga gitohoan nga adto manguha og pangutana ang examiners? Examiners nga usahay ang ipangutana dili ang imong nahibaw-an kun dili ang wa nimo mahibaw-i?

Ang BAR examination usa ni ka buwan pero upat ra gyud ka adlaw ang examination day niini nga ipahigayon matag adlaw nga Domingo kay ang Lunes ngadto sa Sabado gigahin man kini sa binasahay ug inutingkayay sa mga review materials ug pagpaminaw sa lectures sa mga review professors. Ang BAR exams alang niadtong wa pa makahibawo kausa lang ni himoa sulod sa usa ka tuig ug pagahimuon kini matag buwan lamang sa Septiyembre. Walo ka subjects ang BAR examination ug tag duha ka subjects ang i-examine matag Domingo, usa sa buntag ug usa sa hapon maong upat ka Domingo tanan. Ang mga subjects nga i-examine ug pasaron mao ning mosunod:

Unang Domingo: Political Law sa buntag

Labor Law sa hapon

Ikaduhang Domingo: Civil Law sa buntag

Taxation sa hapon

Ikatulong Domingo: Mercantile Law sa buntag

Criminal Law sa hapon

Ika-upat nga Domingo: Remedial Law sa buntag

Legal Ethics & Practical Exercises sa hapon

Kinahanglan nga mopasar ka niining maong walo ka mga subjects ug kinahanglan nga wa kay score nga ubos sa 50 kay kun aduna ka niini disqualified ka na, nga sa ato pa, bisan pasar ang imong general average sa tanang subjects, hagbong gihapon ka.

Kun imong tan-awon sayon ra kay walo ra ugod ka subjects pero ang wa ninyo masayri, kining maong mga subjects gilangkoban kini sa daghang mga balaod sama sa Mercantile Law nga subject. Ubos niining maong subject anaa ang Code of Commerce, Corporation Code, Insurance Code, Maritime Transportation, Negotiable Instrument Law, Common Carriers, Public Service Law, Bulk Sales Law, Trust Receipts Law, Flag Law, Partnership Law, Truth in Lending Act, Documents of Title to Goods, Uniform Currency Law, Price Tags Law, Anti-Dumping Law, Retail Trade Law ug Anti-Dummy Law, Reorganization of SEC Law, Copyright Law, Patent Law, Trademark Law, Insolvency Law, Chattel Mortgage Law, New Central Bank Law, General Banking Law, Rural Bank Law, Off-Shore Banking Law, Secrecy of Bank Deposit Law, Philippine Deposit Insurance Corporation, Salvage Law, Carriage of Goods by Sea Act ug uban pa.

Hinuon sa mga examinees nga mitutok gyud pagmaayo sa ilang pagtuon sa abogasya di na kaayo sila maglisod kay mag review naman lang sila pero sa mga examinee nga sama kanako nga magtuon lang kun mag exam kay maoy gi-major ang pagdala-dala og megaphone ug protesta sa kadalanan, ang nahitabo dili review kun dili, First View! Pun-an pa nga dose na ka tuig una pa ko mokuha pagbalik sa BAR - nagkagidlay gyod tawon.

Nagpasalamat lang ko sa management sa RGMA sa DYSS kay mitugot sa akong hangyo nga mag-leave og usa ka buwan ug tunga sa akong trabaho. Nagpasalamat lang upod ko sa among Dean ug management sa Southwestern University nga gitugotan upod ko og usa ka buwan nga leave. Salamat upod ni Mila ning Banat News nga misabot sa wa nako pagpadala sa akong item bali upod og upat ka semana.

Ang kinse ka adlaw sa akong leave sa DySS mao tawon ang akong gigahin kadiyot pag-utingkay sa mga review materials. Kay apiki na sa panahon, gi-apply ko na lang ang girilya nga klase sa pagreview ug pagtuon - kining tag-an-tag-an ba kun unsay posibleng ipangutana sa exam. Atubangan sa pinili nga mga review materials nga hinatag sa akong mga kahigalaan nga nag-review og tag lima ug unom na ka buwan, gamit ang hinulaman nga gahom ni Madam Auring sa pagpanag-an gisuwayan ko pagbasa ang huna-huna sa examiner sa pamasin nga akong mabasa ang ilang mga ipangutana sa exam. Sa sunod semana akong isaysay ninyo kun misaril ba ang akong gihimo.