"Pagkatoytoy"

Samtang nagmaniho ko pauli sa bukid niadtong Sabado, akong nadawat ang mensahe pinaagi sa text gikan ni Super Bobby Nalzaro nga nagkanayon nga si Mayor Soc Fernandez gipangutana sa iyang tigpaminaw sa dyRF kun nganong wa siya makabadlong sa iyang anak nga si Joavan.

Ang tubag ni Fernandez mao nga “ di ko makabadlong kun di ang Ginoo lamang. Mabasa nato sa Balaang Kasulatan sa 1 Hari ug 2 Timoteo nga ang Ginoo nag-ingon nga way si bisan kinsa ang makahusga sa usa ka makasasala kun di ako lamang.”

Akong huwaman ang pulong ni Super Bobby, “PAGKATOYTOY” gyud nimo Mayor Soc. Unsa ka man buta o bungol ba kaha hinuon nga wa makakita ug makadungog sa binuhatan sa imong sinagop? Wa mag-ingon ang publiko nga husgahi ang imong anak kay di ka huwis nga maoy mohusgar sa iyang mga kaso nga giatubang.

Ang gipangayo sa publiko gikan nimo mao nga imong disiplinahon ang imong anak. Kun wa ka makasabot, lahi ang paghusgar kay sa pagdisiplina. Ang angayan nimong buhaton mao nga ayaw duphi ang badlongon nimong anak aron dili mogara sa iyang kamaldito.

Pasagdi nga ang mga kamot sa balaud maoy mosilot niya, ayaw gamita ang imong impluwensiya pagkonsinter sa hiwi nga binuhatan sa imong anak sama sa pagtungko sa matag biktima ni Joavan aron haylohon nga isibog ang kaso.

Ayaw tuisa ang kamatuoran diha sa Biblia nga imong gisangyaw aron ka mangita’g lusot sa imong pagkakonsintidor nga amahan. Kun di pa ka konsintidor Mayor Soc ikaw untay nangusog pagpapriso sa imong anak aron kalikayan nga makahimo pa og dugang kadaut.

Laing pruweba sa imong pagkakonsintidor mao ang imong pagpangayo og escort alang ni Joavan kay kunohay namiligro ang kinabuhi niini human atakiha sa usa ka lalaki nga sa

akong duda iya ra pong higala ug klasmeyt sa kabadlongon.

Gustong ipatuo ni Mayor Soc nga tinud-anay ang ilang drama sa tinguha kunohay pagpatay sa iyang anak gamit ang habulan nga sundang. Kinsa may giilad ni Soc? Labing siguro dili ang utokan ug mabuot nga katawhan kun dili ang iyang kaugalingon.

Busa sa dili pa ka mutoo hangtud sa iyang bakak Mayor Soc maayo tingali nga hunongon na nimo ang pagdepensa sa imong anak gamit ang mga gituis nga pulong sa Biblia kay basin og gabaan ka.

* * *

Si Mayor Tomas Osmeña mipasalig nga pabahaan og proyekto ang barangay Kalunasan bugti sa paghimo niini nga labayanan sa basura.

Unsa man sab kaha nga proyekto ang mobaha sa P5 milyones lang nga budget? Ang balay lang gani sa kanding nga gitukod ni Konsehal Jing Jing Faelnar dito sa bukid nga migasto man kuno og P750 mil unya atop ra ug haligi ang nagbarog.

Klaro nga panglingla ang maong saad tungod kay asa man og kwarta ang dakbayan alang sa mga proyekto nga iya kunong ipabaha sa Kalunasan? Kun ang supplemental budget no. 2 sa dakbayan giutang pa nila gikan sa Land Bank, asa man sila’g pundo sa laing mga proyekto? Utangon na pod?

Gawas pa di angayan nga ang Kalunasan maoy himoong labayanan sa basura tungod kay residential ang maong dapit. Gawas pa tua ni sa ibabaw ug posibleng ang mga hugaw nga hinunob sa basura makaapekto sa atong mga tinubdan sa tubig dinhi sa ubos nga bahin.

Angayang babagan sa mga opisyal sa barangay Kalunasan ang maong plano. Angayang ipakita ni Kapitan Eddie Mabano nga lahi siya sa ubang mga opisyal nga way dugokan ug lupig pay pahoy sa humayan.

* * *

[email protected]