Mibukal na ang Mandaue

Wala na ko makahisgot sa isyu nga naglambigit sa Mandaue sa milabay nakong mga lindog ug karon nadani ko tungod kay nag-anam na kanindot ang mga isyu.

Kaniadto, pipila ra mi ang nagtuki niini, apan karon ingon sa mao na ang gisumsoman sa mga paghisgut-hisgot sa mga kumentarista sa radyo ingon man nagbansiwag na diha sa mga mantalaan.

Usa kini ka maayong lakang aron matugkad gyud ang tanang mga isyu og makatabang kini aron nga magmatngon na ang nagdumala sa pangagamhanan diha sa Mandaue nga dili makahimo’g binuang.

Dasigon pa g’yod nako ang mga oposisyon nga gipangulohan ni Vice Mayor Carlo Fortuna nga dili g’yod mohunong sa ilang dalaygong kampanya pagsumpo sa mga binuang.

Bisan ang mga isyu nga gihulagway sa uban nga ginagmay, apan wala sila masayod nga daku diay og epekto, sama sa pagpataka og gamit sa mga sakyanan sa kagamhanan angay kini nga ipadayon.

Gamay ra kun imong huna-hunaon apan kun imong ayuhon sa pagpinsar daku kaayo ang epekto niini kay nagpasabot kini nga ang pagpataka og gamit sa sakyanan nakausik sa gasto sa gasolina.

Posible pa gani nga kun dili mabantayan, ang gasolina nga gikuha ug gibayran sa kagamhanan adto itubil sa mga pribadong sakyanan nga iya sa mga opisyal.

Karon mitumaw kining report kabahin sa “Kabanay Incorporated.” Bisan tuod og bunyag-bunyag ra kini sa kabanayan kuno ni Mayor Jonas Cortes nga nag-apil-apil sa pagpadagan sa pangagamhanan sa Mandaue, angay kining tagdon.

Tiaw mo, kun tinuod man ang report nga ang iyaan kuno’s mayor nag-apil-apil sa kalihukan pagpadagan sa merkado? Hesus Maria y Hosep!

Buyno, ang asawa hinuon sa mayor makaingon ko nga mahimo siya nga motabang sa mga proyekto nga pang-babaye ug ang igsuon sa mayor walay problema kun maoy himuon niya nga confidential assistant o kaha secretary.

Natural man nga motabang gyud ang asawa nga mulambo ang dakbayan ubos sa iyang bana, sama kaniadto ni kanhi Mayor Teddy Ouano nga si Ma’am Linda maoy nagdumala sa Clean and Green program ug si Lollipop Ouano-Dizon maoy executive assistant ba kadto sa mayor.

Apan kun ang mga uyoan ug uban pa nga paryente sa mayor musalmot na gani pagkontrolar sa mga proyekto aron adto sa higala nila nga mga kontraktor mahatag ang proyekto, dili na maayo.

Kini maoy bantayan nimo’g maayo Mayor Cortes. Nakadawat ko og report nga ingon niini ang sitwasyon diha sa Mandaue, tinuod ba kini mayor?

Dasigon pa g’yod nako ang oposisyon nga gipangulohan ni Vice Mayor Fortuna nga paspasan ang pagtuki kabahin sa mga “job order employees” kay dili g’yod imposible nga dunay mga binuang niini.

Bisan gani diri sa dakbayan sa Sugbu dili imposible nga kini nahitabo, apan ang problema lang kay wala gyu’y mga konsehal nga sakop sa oposisyon nga makahimo niining maong gimbuhaton.

Mao man bitaw nga nakaingon ko nga pagka-bulahan sa Mandaue nga ang katawhan dunay gipili nga mga politiko nga makahashas sa mga proyekto kun angay ba kini nga ipatuman.

* * *

Ugma, mora’g balikan na usab nato paghisgot ang mga palpak ni Citom executive director Arnel Tancinco kay sa ako nang giingon, maayo lang sa hambog ning tawhana.

Gipasaligan ko niya nga aksyonan dayon niya ang mga reklamo o impormasyon nga ihatag kaniya, apan hangtud karon padayon lang nga nagkyogpos ug walay nahimo.

Bi, kanang bag-ong building eskena D. Jakosalem ug Katedral, atbang sa karaang PLDT, hala butangi dayon na og puthaw nga railings aron dili makahimo og sayop nga pag-park ang mga drayber nga mo-parking.