Ang propaganda sa MILF

Gipakita sa Moro Islamic Liberation Front ang mga bata, tawo ug mga butang nga naapiktohan sa padayong pagbombardiyo sa mga sundawo ngadto kanila. Way laing tumong ang MILF sa pagpakita sa maong mga hulagway ngadto sa katawhan - ang pagkuha og simpatiya sa katawhan, dili lamang dinhi sa Pilipinas kun dili pontarya usab nila ang pagkuha og simpatiya sa katawhan ug mga pangulo sa kanasuran sa kalibutan. Ila kining gituyo aron mapiit unya ang gobiyerno sa Pilipinas sa mga pagsaway ug pressure sa mga pangulo sa kalibutan ilabi na sa mga muslim leaders. Hinungdan nga akong giawhag ang akong mga kaubanan sa buhat nga dili unta suportahan ug tabangan ang Moro Islamic Liberation Front sa ilang propaganda nga makatandog sa kampanya sa atong gobiyerno batok niining maong mga terorista.

* * *

Wa pa gani mahuman ang kaguliyang sa isla sa Camotes ilabi na sa lungsod sa Tudela tungod kay daghan ang gustong magmayor, miulbo na usab ang kaguliyang sa lungsod sa Daanbantayan human ang hukmanan sa siyudad sa Bogo mideklarar sa kaatbang sa mga Loot nga maoy mananaug sa milabay’ng lokal nga bugnong lugaynon. Ang Anak nga si Shimura ug inahan nga si Maria Luisa nga maoy mayor ug bise mayor sa lungsod sa Daanbantayan wa modawat sa hukom ni maghuhukom Marigomen nga nagdeklarar kanila nga mga pildero human sa gipasakang electoral protest sa ilang mga kaatbang sa politika. Unsa na pod kaha ang atong mapaabot sa maong lungsod ug unsa kahay mahitabo sa katawhang Bantayanon?

* * *

Si Lito Ruiz kaha ang magpapili sa pagka mayor sa dakbayan sa Lapulapu atbang kang unang ginang Paz Radaza karong umaabot dos mil diez nga bugnong lugaynon o si Inday Neri? Mao ni ang sagad nakong nabatian nga pangutana sa mga nagsunod sa politika diha sa Mactan. Ako nagtoo nga si Lito Ruiz nagpaka Juan magbubunyag, nag-una siya aron hawanan nang daan ang agianan sa Ginoo kay si Inday Neri mag mayor sa dakbayan sa Lapulapu.