August 18, 2008 | 12:00am
Laray, San Roque, Talisay City
Daghan sa atong mga magwawali karon ang nagkasumpaki ang ilang mga baruganan mahitungod sa Diyos. Adunay daghan nga hugot nga mobarog sa pagtuo nga tungod kay ang Diyos makagagahom sa tanan mahimo niyang buhaton ang tanan nga gustong buhaton ug walay buhat nga dili niya mahimo. Usa lang sa maong mga magwawali ang akong nakita nga wala mosagop sa maong pagtuo, ug siya mao si Bro. Eliseo Soriano, nga karon maoy pangulong magwawali sa Iglesia ng Diyos International. Si Bro. Soriano lang sa tanan nga magwawali ang bugtong mobarog sa pagtuo nga dunay usa ka butang nga dili mahimo sa Diyos bisan paman sa iyang pagkamakagagahom. Ug matud pa ni Bro. Soriano, ang usa ka buhat nga dili gayod mahimo sa Diyos mao ang pagpamakak, ug iya kining gisuportahan pinaagi sa nakasulat diha sa biblia ug ato mabasa sa kasulatan kining mosunod: "In hope of eternal life, which God, that cannot lie, promised before the world began." (Titus 1:2).
Bisan lang gani kun atong gamiton ang pobre ug tawhanon natong kaisipan sa pag sanasana kun ang Diyos sa Iyang pagkamakagagahom mahimo ba usab Siyang mamakak? Sa akong bahin lang bisan og giunsa ko sa pagpuga ang akong kaisipan, wala akoy nakitang punto nga mohatag katarungan nga mahimo sa Diyos ang pamakak bisan kun gusto Niyang buhaton kini.
Atong ipakita kini nga sitwasyon aron gayod malarawan nato sa atong kaisipan ang usa ka kamatuoran. Adunay usa ka tawo nga ngil-ad kaayo ang hitsura. Sa pagkakita sa Diyos kaniya, gusto Niyang bakakan ang mga tawo bahin sa kabati sa hitsura sa maong tawo ug misulti Siya ngadto sa katawhan nga gwapo ang maong tawo ug dihadiha nahimong gwapo ang maong tawo. Sa ato pa nausab ang hitsura sa tawo ug nawala na ang pagkabati niini. Karon, sa maong sitwasyon makaingon ba kita nga namakak ang Diyos? Wala kitay makitang katarungan nga moingon nga nakapamakak ang Diyos. Bisan sa mao lang nga ehemplo, dili na kita mahimong magduda sa Diyos, kon dili pagdawat sa kamatuoran nga bisan kanus-a dili gayod makahimo sa pagpamakak ang Diyos tungod kay kutob sa isulti sa Diyos matinuod gayod kay gamhanan ang tanan nga pulong nga gikan Kaniya ug matuman gayod dayon.
