Saysenta porsiyento sa mga Pinoy, base sa pagtuon sa Pulse Asia ang nagpaabot sa State of the Nation Address ni Presidente Arroyo kagahapong adlawa. Apan trese porsiyento lang ang nituo nga matuman niya ang iyang mga gipangsaad. Ug base sa pagtuon, kuarenta porsiyento sa populasyon ang wa’ nay pagsalig nga matuman ang mga gipangbatbat nga saad sa presidente atubangan sa minilyon ka mga Pilipino. Sa iyang ikawalong SONA, wa’ nay bag-o pang mga panaad. Usa lang ang bag-o, ang gimik ug ang daw ‘fashion show’ nga gipangsul-ob sa mga opisyal sa gobiyerno ug mga pinasidunggang dinapit. Ug samtang nagkadugay, nagkadaghan na hinuon ang wa’y pagsalig sa administrasyong Arroyo.
Kung magpabiling ubos ang pagtuo sa publiko sa usa ka SONA sa presidente, di’ nako masabtan nganong ipamugos paman ang maong kalihukan? Apan sa pikas bahin, kinahanglan nga mo-report ang presidente sa unsay iyang gihimo sa milabay nga tuig ug unsay iya pang pwede mahimo sa laing tuig sa iyang pangatungdanan. Apan ang nakapait, mao nga unsay gamit sa iyang pahayag nga gibilaran sa paghimo ug gipa-ubos sa grabeng pagbatikos sa iyang mga kritiko ug advisers kung sa pagladlad niya ini sa publiko, mapuno ra diay sa pagsaway. Ang labing dakong problema nga kinahanglan og tabang ug solusyon mao ang krisis sa pagkaon ug gasolina.
Pakyas ang presidente sa pagbutyag sa tinud-anay nga estado sa atong nasud. Kung iyang gipasigarbo ang mga nabuhat sa milabay nga tuig, dili kini mao ang natagamtaman sa mga tawo nga naglubog lang gihapon sa kalisud. Kung iyang gipanghimug-atan ang daghang trabahong gibuksan, iyang nakalimtan sa pagbutyag pila ka mga Pinoy ang nakulban sa kaldero tungod sa kapakyas nga pagbalanse sa ekonomiya ug paghatag og igong gahum sa ordinaryong mamumuo nga makasugakod sa pagpabilin sa iyang trabaho ug sa mga negosyante nga may igong pundo ug ganansya aron makapadayon sa ilang negosyo. Hangtud nga magpabilin sa tres mil ka mga Pinoy ang mobiya sa nasud matag adlaw aron mangita’g trabaho sa gawas, pakyas gihapon ang gobiyerno sa kampanya ini alang sa dugang trabaho ug taas nga suholan.
Pakyas ang gobiyernong Arroyo sa pagpakita og simpatiya sa mga tawo nga grabeng naglisud tungod sa taga liog nga presyo sa gasolina nga niresulta sa mahal nga presyo sa gasoline. Nubenta milyones pesos ang nagasto sa gobiyerno sa pagpa-ayo sa Batasan building ug gitumong gyud sa SONA sa presidente ang paggamit ini nga mao say sinyales sa pagbukas sa kongreso. Apan pila ba ka milyon sa mga Pinoy ang nawad-an og panimay ug karon nagpuyo sa mga barong-barong tungod sa grabeng kalisud? Pila ba ka libo ka mga Pinoy ang gipalayas sa ilang gipuy-an tungod kay wa’ na makabayad o gamiton na sa tag-iya sa yuta ang ilang gitukuran sa ilang balay? Pila ba ka mga tawo ang nawad-an sa ilang garbo ug nawad-an sa morale tungod sa grabeng kalisud nga ilang nasinati.
Pakyas ang gobiyerno sa paghatag og balik sa garbo sa matag Pinoy. Hangtud nga magkadaghan ang mga tawo nga nauwaw ug nibasol sa administrasyong Arroyo, magpabiling pakyas ang presidente sa pagpadagan sa atong nasud. Hangtud nga di’ pa mahibalik ang pagsalig sa katawhan sa gobiyerno nga iya untang gitamod ug girespeto, magpabiling pakyas ang presidente sa pagkuha sa pagsalig sa katawhan sa iyang pamunuan. Kung magpabiling basolon sa katawhan ang administrasyong Arroyo, nagpasabot lang ni diskontento gihapon ang katawhan sa iyang pagpadagan sa nasud.
Sentro sa iyang mensahe, ang paghatud sa mga programa nga makatabang sa mga kabus aron mahaw-as gikan sa kalisud. Susamang saad ang iyang giyagyag sa mga nanglabay nga pito ka SONA sa presidente. Hangtud karon, nagpabiling naglubog sa grabeng kalisud ang mga kabus nga mas grabe pa itandi sa nanglabay nga katuigan. Hangtud nga dili masolbad ang problema sa korapsyon ug kahiwian sa gobiyerno, magpabilin ang wa’y pagsalig sa katawhan sa kasamtangang pamunuan. Ug hangtud nga di’ magmatinud-anon ang administrasyon sa iyang saad sama sa minilyong trabaho ug pagkaon sa matag lamesa, wa’y laing hatud ang SONA gawas nga tinubdan ni sa kataw-anan ug tataw nga ebidensya sa pagpanglingla ug pagpamakak.