Basaha ug sabta gyud

Ang tinuod wala ako masayop sa pagpagawas sa report nga gikutlo gikan sa Commission on Audit nga ang kagamhanan sa probinsya sa Sugbu mi-hire og ECCD officer nga dili haum sa iyang katungdanan.

Kining maong katin-awan agi kini’g pagpasabot kay duna man go’y news report nga gipublikar sa laing mantalaan kagahapon nga nangayo ko og pasaylo nga mora’g ang gipasabot nga sayop ang akong report.

Mahimong kun dili ko kini himoon ang paghatag sa katin-awan magtoo ang akong mga “readers” nga wala ko’y hibangkaagan nga pagka reporter.

Ang pagpangayo nako og pasaylo mao lang ang pagkasipyat paggamit sa termino nga “management” nga nabutang nako sa report nga Kapitolyo – inay Commission for the Welfare of Children.

Gisakitan ang mga opisyal sa Kapitolyo kay sa ako god nga report nga napublikar niadtong miaging semana, nagbutyag man nga ang provincial ECCD officer sa Sugbo “unqualified” sa iyang pwesto.

Akong pasabton ang mga opisyal sa probinsya nga ang mga sakop sa media mogamit sa mas mubo ug mas sayon sabton nga pulong nga susama ra og kahulogan.

Sa audit report sa mga transaction sa Commission for the Welfare of Children, usa sa mga findings sa COA nagkanayon. “The provincial ECCD officer hired by the provincial government of Cebu did not meet the qualification standard set forth in section 45 of the IRR of RA 8980.”

Pangutan-on nako ang mga opisyal sa Kapitolyo kun unsa man diay pagsabot nila sa pulong “did not meet the qualification?” Dili ba diay tukma ang termino “unqualified” aron masabtan?

Ang Implementing Rules and Regulations (IRR) sa Republic Act 8980 naglatid nga ang kuhaon isip Early Childhood Care and Development Officer kinahanglang dunay Master’s Degree sa mga ECCD-related fields sama sa social work, community development, health, education, nutrition, psychology ug batid sa program management sa mga  kurso nga may kalambigitan sa ECCD.

Dili ako maoy nagbuhat-buhat sa report nga ang tawo nga gikuha sa Kapitolyo isip ECCD officer kuwang og Master’s Degree sa mga ECCD-related fields kun dili ang COA.

Kun moingon ang mga opisyal sa Kapitolyo nga dili sila ang nag-hire, kay kuno ang Commission for the Welfare of Children sa Manila, ila kana nga argumento.

Kaklaro sa report sa COA nga sila ang nag-hire. Number 54 sa COA report nagkanayon. “Management commented that the Provincial ECCD officer of the Province of Cebu was hired by the Provincial Government with the concurrence of the CWC on the following basis, to wit:

Timan-i ninyo ug sabta pag-ayo ang pulong “was hired by the provincial government.”

Sabta usab pag-ayo ang comment sa COA nga anaa sa number 52 sa ilang audit report nga nagkanayon “In every organization, qualification standard for each position is being set up as criteria to hire the person that fits the position. If the set standard is not being followed it becomes useless or futile. Further, other LGUs might take this up as a precedent.”

Nagtoo ko nga ang ubang opisyal sa Kapitolyo wala gayod makabasa sa audit report sa COA. Ang akong report nga gi-publish sa The Freeman wala magtumong nga pakauwawan ang hingtungdang ECCD officer.

Kini maoy rason nga bisan og ang among editor nangayo sa iyang ngalan wala nako ibutang, kay wala man usab kini ilha diha sa audit report. Kun dili kamo makamao nga motultol kun diin gikuha ang report diha sa COA website, ayaw kataha kay tudloan ko kamo.