Ang mga gamhanan

Niining semanaha gikatakda nga magkita ang mga lider sa ubos balay balauranan ug ang mga obispo sa simbahang katoliko aron tuki-on ang ilang managlahing baruganan sa Consolidated Reproductive Health Bill nga gihingusgan sa mga kongresista nga mapalabang apan hugot usab nga gibabagan ug gisupak sa katolikong simbahan.

Si Kongresista Edsel Lagman sa Albay kinsa maoy nangamahan sa balaudnon namahayag sa iyang kaandam pagpasabot ngadto sa mga obispo ug kaparian mahitungod sa kamahinungdanon sa balaudnon ug sa kasayop sa ilang pagtoo nga kini nagdasig sa abortion. Apan iya pod nga gitin-aw nga dili na gayod mausab ang iyang baruganan bisag moabot pa kuno og usa ka siglo ang pagpasabot sa mga obispo ug kaparian ngadto kaniya.

Ang simbahan wa gayo’y mahimo kun ang mga sakop sa kongreso modesider sa pagpalabang sa Reproductive Health Bill kay di man sila makaapil sa pagboto sa balaudnon. Pero ang kongreso wa poy mahimo kun tuk-on sa simbahan si Pangulong Arroyo aron dili pirmahan ang balaudnon nga gisupak niini. Hinuon, puwede pang ma-override sa kongreso ang veto power sa pangulo apan murag lisod na kining mahitabo ug kun mahitabo man puwede ra gihapon kining ipadaplin lang sa pangulo ug dili ipatuman susama sa nahitabo sa death penalty law .

Ang Reproductive Health Bill sukdanan kini karon kun si kinsa ang gamhanan sa mga sakop sa kongreso ug sa simbahang katoliko.

* * *

Pribado na ba karon ang dalan Colon? Taud-taod naman ugod nakong nakita nga adunay mangolekta og tag P9 ngadto sa P10 sa matag sakyanang de pasaheroan nga moagi sa maong dalan? Aduna na diay toll fee ang Colon? Kun aduna man, ayaw pod tawon nang mga bagis kaayog dagway ug daghag patik sa lawas ang pakolektaha ninyo oy kay mahadlok ang mga driver. Bitaw! Unsa namay nahitabo sa atong anti-dispatching ordinance, gipatuman pa ba kini dinhi sa dakbayan? Miabuso naman ugod og maayo kining mga dispatser diha sa may dalan Colon. Gawas nga gihimo na nilang terminal ang dalan Colon, hasol pa gyod kini sa mga driver. Ambot lang og wa bay labot sa bahin ang atong police dinhi sa dakbayan sa makolekta sa mga dispatser? Makita man ugod nako usahay nga dili halayo sa dalan Colon adunay nagpahipi nga patrol car sa atong kapulisan dinhi sa Sugbu.