Kinsa man ako?

Usa sa mga dako kaayong nakapabug-at karon gawas sa trahedya nga nahitabo sa MV Princess of the Stars tungod sa bagyo nga Frank mao ang pag-ila sa mga patay’ng lawas sa mga biktima. Taas ug dugay ang proseso wala pay labot sa gasto. Lisud na kaayo sila ilhon tungod kay kadaghanan kanila, ang naa na sa estado sa pagkadugta. Apan magpabilin silang nailhan diha na lang sa mga handumanan sa ilang mga minahal sa kinabuhi. Ang pangutana tingali sa mga biktima ngadto sa mga taga-Sulpicio ug sa mga kabanay: “Kinsa man kami alang kaninyo?” Bugtong ang mga hingtungdan lamang ang makatubag niini.

Ang pangutana sa atong Ginoo ngadto sa iyang mga tinun-an adunay kalabutan sa iyang pagka-siya o sa iyang identity. Kasagaran kanila ang mitubag pinasukad sa public opinion mahitungod kaniya. Apan si Simon Pedro mihatag sa iyang personal confession of faith nga si Jesus dili lang propeta kondili Mesiyas gyud. Kini tungod kay si Simon Pedro nakaila sa Ginoo dili lang sa hunahuna kondili apil na usab sa iyang kasingkasing ug kasinatian. Sa laing bahin, ang apostol sa mga hentil nga si San Pablo nangutana sa pagtino sa hinungdan sa dakong silaw nga nakapabuta kaniya sa makadyot: “Si kinsa ka ba Ginoo? Ug ang tingog mitubag: Ako si Jesus nga imong gilutos!” (Buhat. 9:5-6). Ang maong panagtagbo ang nagdala og dakong kausaban sa kinabuhi sa numero unong tiglutos sa mga sumusunod ni Jesus ngadto sa usa ka magsasangyaw sa nabanhaw’ng Jesus ngadto sa kalibotan sa mga hentil.

Nagkadaiya ang ilang kasinatian sa atong Ginoo apan managsama silang mitahan sa ilang kinabuhi alang ning maong Ginoo nga ilang gihigugma ug gituohan. Ang nakapahimo sa atong kinabuhi karon nga haw-ang ug lad-ang mao ang atong kapakyas sa pag-ila sa Ginoo dili lamang sa atong tawhanong pangagpas kondili diha sa pagdumili sa pag-ila kaniya diha sa atong inadlaw’ng kasinatian.