Tulobagon

Nasurpresa ang tinahod ug tinamod namong publisher nga si Mr. Juanito V. Jabat sa birthday party nga gihatag kaniya ni Sir Dodong Gullas niadtong Lunes sa hapon didto sa Casino Español.

Nasurpresa lakip kaming mga empleyado sa The Freeman ug Banat News sa tinguha ni Sir Dodong nga himuong surprise birthday party alang kang Sir Jabat ang maong kalihukan.

Natandog kaayo kami sa gipakitang kamapahiubsanon ni Sir Jabat. Bisan sa kataas na sa iyang naabtan nga mikuyog sa pagtaas sa iyang edad, walay kausaban ang iyang pagtratar kanamo, ug kadtong nakasuhito sa iyang pagka-Sir Jabat sukad pa kaniadto, nakasulting mao lang gihapon si Sir Jabat, humble lang kaayo gihapon.

Sa maong party, si Leo Lastimosa nga naila nang tinamod nga haligi sa broadcast industry, mipakasama ni Sir Jabat nga usa ka institusyon, sama sa iyang gialagaran sulod sa 43 ka tuig, ang The Freeman.

Apan alang kanako, si Sir Jabat usa ka amahan, magtutudlo, kauban ug higala nga sa tanang higayon masangpit sa bisan unsang klase sa mga tawo.

Gikan sa mga Gullas ug sa mga opisyal sa Star Group of Publications, hangtod sa mga opisyal ug mga kawani sa The Freeman ug Banat News nga makasayon-sayon lamang og duol kang Sir Jabat, hangtod na ngadto sa mga janitor, guwardiya, news dealer, news contributor, bisan mga bisita nga wala sa saktong paghunahuna, ug kadtong mga magpakilimos, si Sir Jabat walay pagduhaduha sa pag-abi-abi.

Kami nga mga opisyal ug empleyado niining pamantalaan, nangindahay nga masunod namo ang mga hiyas ni Sir Jabat, bisan naman lang makatupong kami sa iyang pagkakalmado nga bisan sa dakong suliran, igo lang mongisi ug magpabiling pagkakalmado.

Kanimo sir, saludo kaayo ko!

* * *

SULPICIO. Sayo pa kaayo aron ibubo nato ang tanang pagbasol ngadto sa Sulpicio Lines sa nahidangatan sa kapin 700 ka mga pasahero ug kapin sa usa ka gatus ka mga tripulante sa nalunod nga MV Princess of the Stars.

Niining higayona, hatagan una nato og kahigayonan ang Sulpicio Lines ug ang mga rescue units sa pagpangita sa mga nahibiling pasahero ug tripulante.

Sa pagkakaron, mao kana ang buhatonon samtang pabilin pa nga dili ma-account ang matag lawas -– buhi man o patay –- sa matag tawo nga misakay sa MV Princess of the Stars.

Sa mga asawa o bana, anak, paryente, o kahigalaan sa mga pasahero ug tripulante nga nakasinati sa mapait nga pagkalunod sa barko, maayong pasagdan una nato ang Sulpicio Lines ug ang tanang search and rescue units sa ilang trabaho.

Nakasabot kita sa gibati sa mga tagtungod.

Dili lalim ang mawad-an og (mga) mahal sa kinabuhi.

Dili mapugngan ang kaguol sa tawong mawad-an og mahal sa kinabuhi.

Samot na nga dili lalim ang sitwasyon nga walay kaseguroan nga buhi o patay ang mahal nato sa kinabuhi nga nakasakay sa barkong nalunod.

Ang labing maayong buhaton karon nga mag-ampo kita aron pangayuon sa Ginoo nga buhion kadtong mga wala pa makit-i ug nagpabiling missing hangtod ning mga gutloa.

Unya na kita motulisok sa angayan natong tulisokon kun mahuman na ang pagpangita sa tanang mga pasahero ug tripulante nga sakay sa barko.

Dili pa karon ang panahon sa pagbasol sa angayang basolon.

Ang Sulpicio Lines igo lamang magpaabot kun adunay kasong ipasaka batok kanila tungod sa nahitabo sa MV Princess of the Stars.

Tungod kini sa atong balaod sa transportasyon nga ang “negligence” kun pagkadanghag sa common carrier (ang barko sa Sulpicio) giisip nga “presumed” ug ang Sulpicio na ang moprobar sa korte nga dili kini danghag.

Walay laing buhaton ang mga biktima ug ang mga tagtungod (heirs) gawas sa pagprobar ngadto sa korte nga nakasakay sila sa barko ug nga wala sila makaabot sa destinasyon subay sa gikasabutan tungod sa wala pagtuman sa Sulpicio sa contract of carriage.

Apan dili sibo kun itutok ang tanang pagbasol ngadto sa Sulpicio.

Timan-i nga aduna kitay mga ahensiya sa gobyerno nga mahimong nakahatag og hinungdan sa pagkalunod sa MV Princess of the Stars. Adunay Maritime Industry Authority (Marina) nga gitahasan sa atong kagamhanan sa pag-monitor sa mga common carriers kun “seaworthy” ba kini matag higayon nga molawig kini sa kadagatan.

Ubos sa atong balaod, usa sa depensa sa common carriers nga seaworthy sila sa ilang paglawig. Apan dili kini makapapas sa ilang tulobagon, hinuon mahimong pagamyan lang kun masuta nga walay “negligence” sa ilang habig atol sa disgrasya.

Sa pagsulat ning atong Tikdol sa Pordoy, adunay mga balita nga nanggawas nga dili lamang ang MV Princess of the Stars ang naaksidente niadtong Sabado.

May balita nga adunay cargo vessel nga nagkarga og mga coal gikan sa isla sa Simarara, Marinduque nga natikyaob usab samtang nagpaingon sa Toledo city.

Gawas sa maong cargo vessel, adunay duha ka barkong de pasaheroan sa duha ka shipping lines ang gikatahong nangasangad.

Mao kini ang hinungdan nganong adunay mga na-report nga nangdagsa sa mga silingang mga probinsiya sa Kabisay-an ug Southern Luzon.

Gawas sa Marina, adunay Philippine Coast Guard nga maoy katapusang ahensiya sa gobyerno nga maoy masayod ug mohatag og pagtugot sa usa ka barko kun angayan ba kining molawig, base sa weather forecast nga iisyu sa Philippine Atmospheric Geophysical Astronomical and Seismological Administration (Pagasa).

Angayang tan-awon ang pagpabaya sa Coast Guard sa dagan sa panahon hinungdan sa pag-isyu niini og clearance nga makalawig ang MV Princess of the Stars.

Depensa nila nga signal number 1 pa ang bagyo sa dihang milawig ang barko. Timan-i nga kun signal number 1, duha lamang ang kapaingnan niini –- kun dili molurang ang bagyo mosaka kini sa signal no. 2 ngadto sa no. 3 o mas taas pa.

Depensa nila nga ang bagyo paingon sa Bicol. Apan daghan ang natala sa kasaysayan sa bagyo nga kasagaran niini moliko gyud ug dili mosubay sa direksiyon nga na-establisar niini sa satellite.